ACHANTA SHARATH KAMAL ANNOUNCES RETIREMENT: प्रेरणादायी खेळाडू

भारतीय टेबल टेनिसची पताका गेल्या दोन दशकांपासून सतत उंचावत ठेवणाऱ्या आणि चाहत्यांच्या अपेक्षा उंचावणाऱ्या अचंता शरथ कमलने निवृत्ती जाहीर केल्याने या खेळाच्या भारताच्या इतिहासातील एक पान उलटले गेले आहे. या ४२ वर्षीय खेळाडूने दहा वेळा पुरुष गटाचे जेतेपद पटकावले, ‘आयटीटीएफ प्रो टूर’चे जेतेपदक पटकावले, राष्ट्रकुल क्रीडा स्पर्धेत एकेरीचे जेतेपद मिळवले, ऑलिम्पिकमध्ये पाच वेळा भारताचे प्रतिनिधित्व केले. अशी कामगिरी करणारा तो भारताचे एकमेव टेबल टेनिसपटू ठरला. गेल्या पॅरिस ऑलिम्पिकमध्ये त्याला भारताचा ध्वजवाहक म्हणून मानही देण्यात आला. चेन्नईत १२ जुलै १९८२ रोजी जन्मलेल्या शरथ कमलने वयाच्या चौथ्या वर्षी टेबल टेनिसचा श्रीगणेशा केला. वडील श्रीनिवास राव आणि काका मुरलीधर राव यांच्या मार्गदर्शनाखाली त्याने टेबल टेनिसचे धडे गिरवले. सुरुवातीला त्याला फारसे यश मिळाले नाही. मात्र, अपयशातून शिकून-शिकून त्याने यशाचा मार्ग तयार केला. सन २००४मध्ये राष्ट्रकुल अजिंक्यपद स्पर्धेत जेतेपद पटकावल्यानंतर त्याने मागे वळून पाहिले नाही. त्याच वर्षी त्याने ऑलिम्पिक पदार्पणही केले. दोन वर्षांनंतर त्याने मेलबर्न राष्ट्रकुल क्रीडा स्पर्धेत संस्मरणीय यश मिळवले आणि एकेरीत सुवर्णपदक पटकावले. या स्पर्धेत त्याने १३ पदके मिळवली. यात सात सुवर्ण, तीन रौप्य आणि तीन ब्राँझपदकांचा समावेश आहे. हे यश त्याच्या अथक मेहनतीचेच फळ होते. त्याच्यातील जिंकण्याची भूक ही चाळिशीनंतरही कायम होती. वीसहून अधिक वर्षे टेबल टेनिसमध्ये ठसा उमटवणारा शरथ कमल सतत नव्या गोष्टी शिकत राहिला. खेळाच्या स्वरूपात, तंत्रात होणारे बदल स्वीकारले. आत्ताच्या तरुण खेळाडूंना लाजवेल, असा उत्साह त्याच्यात चाळिशीनंतरही पाहायला मिळत होता. त्याची ऊर्जा आणि यश अनेकांना प्रेरणा देणारे आहे. आता निवृत्तीनंतर या खेळाची सेवा करण्याचा मनोदय त्याने व्यक्त केला आहे. खेळाडू म्हणून त्याने भारतीय टेबल टेनिसमध्ये सोनेरी इतिहास घडवला आहे. त्याच्या नव्या खेळीसाठी शुभेच्छा.

2025-03-10T08:09:05Z