LATUR HSC RESULT NEWS : केंद्रात पहिला आला, बारावी परिक्षेची लढाई जिंकली पण आयुष्याची लढाई...; निकाल लागण्यापूर्वीच शेरुला मृत्यूने कवटाळले
ऋषिकेश होळीकर, लातूर : लातूर जिल्हा हा दहावी व बारावीसाठी लातूर पॅटर्न (Latur HSC Pattern) म्हणून ओळखला जातो. यामध्ये अनेक विद्यार्थी पैकीच्या पैकी गुण घेतात यामुळे या पॅटर्नला वेगळे महत्त्व प्राप्त झाले आहे. मात्र यावर्षी वीस वर्षानंतर सर्वात कमी निकाल लागल्याचे समोर आले आहे. यातच लातूर जिल्ह्यातील देवणी येथील एका आठवड्यापूर्वी झालेल्या एका युवकाचा नुकताच बारावीचा निकाल जाहीर झाला. त्या विद्यार्थ्याने ९० टक्के गुण घेऊन लातूर केंद्रातून सर्वप्रथम येण्याचा मान मिळवला आहे. पण हे यश पाहण्याचे भाग्य त्याला लाभले नाही. यामुळे सर्वत्र हळहळ व्यक्त करण्यात येत आहे. ही दुर्दैवी कहाणी आहे देवणी येथील विवेक वर्धिनी उच्च माध्यमिक विद्यालयात बारावी विज्ञान शाखेत शिकणारा विद्यार्थी सय्यद मोहम्मद कासिफ उर्फ शेरू याची. शेरुने मोठ्या मेहनतीने व जिद्दीने अभ्यास करत बारावीची परीक्षा दिली. एचएससीचा निकाल जाहीर झाला आणि ९० टक्के गुण घेऊन केंद्रातून प्रथम येण्याचा मान शेरुने मिळवला. मात्र हे यश पाहण्याचे भाग्य त्याला लाभले नाही. कारण गेल्या आठवड्यात तो नातेवाईकाच्या कार्यक्रमानिमित्त बाहेरगावी गेला असता तेथे पोहोण्याच्या नादात त्याचा बुडून दुर्दैवी अंत झाला होता.
लहानपणीच वडिलांचे छत्र हरपले
लहानपणीच वडिलांचे छत्र हरवलेल्या कुटुंबाला शिक्षणाचे गंध नसलेल्या माता सह तीन भावंड व सहा बहिणी असा पारिवारिक प्रपंच असंख्य अडचणी झेलत मोठ्या बंधूच्या बांधकाम व्यवसायातून सुरू असलेल्या कुटुंब वाटचालीची जाण ठेवत त्याने यशाचे शिखर गाठले मात्र त्याच्या व कुटुंबीयांच्या नशिबी वेगळेच होते. विशेष म्हणजे त्यांनी जे. ई . व एम एस सी टी. पी सी एम. या स्पर्धा परीक्षा पण दिला होतापण नियतीला काही वेगळेच मान्य होते.