नीरज चोप्राचे स्वप्न अखेर पूर्ण होणार, भारतात प्रथमच 'या' स्पर्धेचे आयोजन होणार; जगातील टॉप-१० भालाफेकपटू सहभाग घेणार
मुंबई: नीरज चोप्राने गेल्या काही वर्षांत भारताला जगभर प्रसिद्धी दिली आहे. नीरजने प्रथम टोकियो ऑलिम्पिकमध्ये भालाफेक स्पर्धेत सुवर्णपदक आणि नंतर पॅरिसमध्ये रौप्यपदक जिंकून इतिहास रचला होता. आता तो पुन्हा एकदा ऐतिहासिक काम करणार आहेत. नीरज नेहमीच आंतरराष्ट्रीय स्तरावरील भालाफेक स्पर्धा भारतात आयोजित करण्याच्या बाजूने राहिला आहे. आता त्याचे स्वप्न पूर्ण होणार आहे. ॲथलेटिक्स फेडरेशन ऑफ इंडियाने आंतरराष्ट्रीय भालाफेक स्पर्धेची घोषणा केली आहे. यात जगातील टॉप-१० भालाफेकपटू सहभागी होणार आहेत.
नीरजच्या देखरेखीखाली कार्यक्रम होणार
AFI चे १२ वर्षे अध्यक्ष असलेले आदिल सुमारीवाला यांनी भारतात आंतरराष्ट्रीय भालाफेक स्पर्धा आयोजित करण्याबाबत माहिती दिली आहे. त्यांनी सांगितले की," या कार्यक्रमासाठी जगातील दहा सर्वोत्तम भालाफेकपटूंना आमंत्रित केले जाईल, ज्यामध्ये नीरज चोप्रा देखील सहभागी होणार आहेत. सर्वात मोठी गोष्ट म्हणजे नीरज केवळ स्पर्धेत खेळणार नाही तर त्याच्या संघटनेवरही तो पूर्णपणे देखरेख ठेवणार आहे. या कार्यक्रमाचे आयोजन करणाऱ्या संघात तो सामील झाला आहे." AFI हे JSW आणि परदेशी कंपन्यांच्या सहकार्याने पूर्ण करेल. नीरजमुळे भालाबाबत वाढता उत्साह पाहता हा निर्णय घेण्यात आला आहे. देशातील अधिकाधिक तरुणांना या खेळाची माहिती व्हावी आणि आंतरराष्ट्रीय स्तरावर या खेळात देशाचे प्रतिनिधित्व करता यावे, हा या कार्यक्रमाचा उद्देश आहे. सध्या जगातील सर्वोत्तम भालाफेकपटूंशी स्पर्धा करण्यासाठी डायमंड लीगमधील परदेशी स्पर्धांमध्ये जावे लागते.
भारत अनेक आंतरराष्ट्रीय कार्यक्रमांचे आयोजन करणार
१२ वर्षानंतर AFI चे अध्यक्ष आदिल सुमारीवाला यांचा कार्यकाळ संपला आहे. आता त्यांच्या जागी २००२ च्या आशियाई क्रीडा स्पर्धेत शॉटपुट स्पर्धेत सुवर्णपदक विजेते बहादूर सिंग सागू यांची नवीन अध्यक्ष म्हणून निवड करण्यात आली आहे. त्याच्या आगमनानंतर, AFI आता भालाखेरीज इतर अनेक आंतरराष्ट्रीय स्पर्धांचे आयोजन करण्याचा विचार करत आहे. मात्र, आदिल सुमारीवाला यांनीच त्याची सुरुवात केली. AFI ने २०२७ मध्ये वर्ल्ड रिले, २०२८ मध्ये वर्ल्ड ज्युनियर चॅम्पियनशिप आणि २०२९ वर्ल्ड चॅम्पियनशिप आयोजित करण्याची इच्छा व्यक्त केली आहे. या सर्व कार्यक्रमांसाठी भारत बोली लावणार आहे.