मुंबई इंडियन्स आणि आरसीबी एकमेकांना भिडणार, हेड टू हेड रेकॉर्ड, कुठे किती वाजता होणार सामना? जाणून घ्या

मुंबई : महिला प्रीमियर लीग २०२६ आजपासून नवी मुंबईत सुरू होत आहे. स्पर्धेतील पहिला सामना गतविजेत्या मुंबई इंडियन्स आणि रॉयल चॅलेंजर्स बंगळूर (आरसीबी) यांच्यात डॉ. डी. वाय. पाटील स्पोर्ट्स अकादमी येथे खेळला जाईल. मुंबई इंडियन्सचे नेतृत्व हरमनप्रीत कौर करत आहे, तर आरसीबीची कमान भारतीय महिला संघाची स्टार फलंदाज स्मृती मंधाना सांभाळणार आहे. हा सामना संध्याकाळी ७:३० वाजता सुरू होईल, तर नाणेफेक ७ वाजता होईल.

मुंबई इंडियन्स महिला प्रीमियर लीगच्या इतिहासातील सर्वात यशस्वी संघ आहे. त्यांनी स्पर्धेतील तीनपैकी दोन विजेतेपदं पटकावली आहेत. आरसीबीनेही एकदा विजेतेपद मिळवले आहे. त्यामुळे या दोन्ही संघांमधील लढत अत्यंत चुरशीची होण्याची अपेक्षा आहे. महिला प्रीमियर लीगमध्ये आतापर्यंत या दोन्ही संघांमध्ये एकूण ७ सामने झाले आहेत. यापैकी मुंबई इंडियन्सने ४ सामने जिंकले आहेत, तर आरसीबीने ३ सामन्यांमध्ये विजय मिळवला आहे.

आरसीबीसाठी एक मोठा धक्का बसला आहे. ऑस्ट्रेलियाची एलिस पेरी, जी महिला क्रिकेट इतिहासातील सर्वोत्तम अष्टपैलू खेळाडूंपैकी एक मानली जाते, ती या हंगामातून बाहेर पडली आहे. पेरी लीगमध्ये सर्वाधिक धावा करणाऱ्या फलंदाजांच्या यादीत दुसऱ्या क्रमांकावर आहे आणि तिने १४ बळीही घेतले आहेत. मुंबईविरुद्ध २०२४ च्या हंगामात पेरीने १५ धावा देऊन ६ बळी घेतले होते, जो या स्पर्धेतील कोणत्याही गोलंदाजाचा सर्वोत्तम कामगिरीचा विक्रम आहे.

रॉयल चॅलेंजर्स बंगळूर संघाची संभाव्य संघात स्मृती मंधाना (कर्णधार), जॉर्जिया वोल, गौतमी नाईक, ग्रेस हॅरिस, ऋचा घोष (यष्टीरक्षक), नादिन डी क्लार्क, पूजा वस्त्रकार, राधा यादव, श्रेयंका पाटील, अरुंधती रेड्डी, लॉरेन बेल, कुमार प्रथ्योशा, सयाली सतघरे, प्रेमा रावत, दयालन हेमलता, लिन्से स्मिथ यांचा समावेश आहे.

मुंबई इंडियन्स संघाची संभाव्य संघात हेली मैथ्यूज, जी. कमालिनी (यष्टीरक्षक), नेट सायव्हर-ब्रंट, हरमनप्रीत कौर (कर्णधार), अमेलिया केर, अमनजोत कौर, सजीवन सजना, पूनम खेमनार, संस्कृती गुप्ता, शबनीम इस्माइल, त्रिवेणी वशिष्ठ, नल्ला रेड्डी, राहिला फिरदौस, मिल्ली इलिंगवर्थ, सैका इशाक, निकोला केरी यांचा समावेश आहे.

2026-01-09T07:08:20Z