RAFAEL NADAL AND ANDY MURRAY: ऑलिम्पिक व्यासपिठावर ‘गुडबाय’ संस्मरणीय ठरणार; दिग्गज खेळाडूंकडून होऊ शकते निवृत्तीची घोषणा

पॅरिस (विनायक राणे): ‘यंदाचा आंतरराष्ट्रीय टेनिस मोसम आपल्या व्यावसायिक कारकिर्दीतील अखेरचा ठरू शकतो’, असे संकेत देताना रफाएल नदालने पॅरिस ऑलिम्पिकमध्ये सहभागी व्हायला आवडेल, असे आवर्जून सांगितले होते. नितंबांच्या शस्त्रक्रियेतून सावरलेला नदाल कारकिर्दीच्या अंतिम टप्प्यात आहे. त्यामुळे पॅरिस त्याचे अखेरचे ऑलिम्पिक असेल यात शंका नाही.

आंतरराष्ट्रीय टेनिसला निरोप देण्यासाठी नदाल यंदाच्या ऑलिम्पिकची निवड करूच शकतो; कारण त्याने दणाणून सोडलेल्या फ्रेंच ओपनच्या संकुलातच ऑलिम्पिकच्या टेनिस स्पर्धा रंगणार आहेत. त्यामुळे इथे केलेला ‘गुडबाय’ संस्मरणीय ठरेल. त्याच्या २२ ग्रँडस्लॅम जेतेपदांपैकी १४ जेतेपदे ही फ्रेंच ओपनची आहेत. इथेच २७ जुलैपासून ऑलिम्पिकच्या टेनिस स्पर्धांना सुरुवात होणार आहे.

-खालावलेली कामगिरी

शस्त्रक्रियेनंतर नदालची कामगिरी प्रचंड खालावली आहे. गेल्यावर्षीच्या जानेवारीपासून फक्त १६ सामने खेळलेल्या नदालला अवघ्या आठ लढती जिंकण्यात यश आले आहे. यंदा फ्रेंच ओपनमध्ये तर तो पहिल्याच फेरीत गारद झाला. ‘गेल्या दोन वर्षांत माझ्या शरीराने दुखापती, शस्त्रक्रिया अशी अनेक दुखणी सोसली आहेत. त्यामुळे आता या वळणावर मी नेमकी काय अपेक्षा करू, तेच कळत नाही’, असे नदाल म्हणाला.

नदालची तयारी...

-ऑलिम्पिकच्या पूर्वतयारीसाठी विम्बल्डनमधून माघार

-विम्बल्डनच्या ग्रास कोर्टवरून ऑलिम्पिकसाठी पुन्हा क्ले कोर्टवर परतणे या वयात जड गेले असते, त्यामुळे निर्णय

-फ्रेंच ओपन, विम्बल्डन अशा सलग ग्रँडस्लॅम स्पर्धा जिंकणाऱ्या अल्कराझसह नदाल ऑलिम्पिक दुहेरीत खेळणार

-याआधी नदालची बीजिंग ऑलिम्पिकच्या एकेरीत सुवर्ण, तर रिओ ऑलिम्पिकच्या दुहेरीत (मार्क लोपेझसह) सुवर्ण पदकांची कमाई

-कारकिर्दीच्या अंतिम टप्प्यात ऑलिम्पिक पदक त्याच्यासाठी मोठी कामगिरी ठरू शकते

मरेचाही ‘गुडबाय’?

फेडरर, नदाल, जोकोविच या त्रिमूर्तींच्या यशोमालिकेदरम्यान अँडी मरेची तीन ग्रँडस्लॅम जेतेपदे आणि दोन ऑलिम्पिक सुवर्ण पदके लक्षात राहतात. टेनिस इतिहासात एकेरीतील दोन ऑलिम्पिक सुवर्ण पदके पटकावणारा मरे हा एकमेव पुरूष टेनिसपटू आहे. त्याने लंडन (२०१२) आणि रिओ (२०१६) ऑलिम्पिकच्या एकेरीत सुवर्ण पदकांची कमाई केली आहे.

२०१९मध्ये त्याच्यावर नितंब बदलाची शस्त्रक्रिया झाली, तसेच इतर दुखापतींनीही डोके वर काढल्याने मरे मागे पडला. गेल्या महिन्यातच त्याच्या मणक्यातून सिस्ट काढण्याची प्रक्रियाही झाली.

‘नदाल आणि मरे कारकिर्दीतील अखेरच्या ऑलिम्पिकला सामोरे जात आहेत. मुळात अशा मानाच्या स्पर्धांमध्ये त्यांचा सहभाग असणेच मोठी बाब आहे. अशा खेळाडूंचा खेळ बघणे म्हणजे मेजवानीच. दुखापतींनी या दोघांचा पिच्छा पुरविला आहे. मात्र तरीही हे दोघे खंबीर उभे आहेत, पुनरागमनाचा विचार करत आहेत, हे सारे नव्या पिढीने शिकण्यासारखे आहे’, असे अमेरिका टेनिस संघाचा प्रशिक्षक बॉब ब्रायन म्हणाला.

दृष्टिक्षेप

-नोव्हाक जोकोविच, इगा स्वियातेक, कोको गॉफ हे अद्याप ऑलिम्पिक सुवर्ण पदकापासून दूरच

-विक्रमी २४ ग्रँडस्लॅम जेतेपदे पटकावणाऱ्या जोकोविचला ऑलिम्पिक सुवर्ण पदकाची आस

-चारवेळा फ्रेंच स्पर्धा जिंकणाऱ्या इगालाही खुणावते आहे ऑलिम्पिकसुवर्ण

-गेल्यावर्षी अमेरिकन ग्रँडस्लॅम जिंकणाऱ्या गॉफकडून अमेरिकेला सुवर्ण पदकाची अपेक्षा

-टोकियो ऑलिम्पिकसाठी रवाना होतानाच करोनाचा संसर्ग झाल्याचे गॉफचा ऑलिम्पिक सहभाग हुकला होता

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-07-18T05:09:57Z