RAHUL DRAVID: राहुल द्रविड यांच्याकडे नवीन जबाबदारी; टीम इंडियाला विश्वविजेता बनवल्यानंतर आयपीएलमधील 'या' संघाची धुरा प्रशिक्षक म्हणून हाती घेणार

मुंबई: टीम इंडियाने टी-२० वर्ल्ड कप जिंकून विश्वविजेता होण्याचा मान पटकावला. टीम इंडियाला विश्वविजेता बनवण्यासाठी प्रशिक्षक राहुल द्रविड यांचे लाखमोलाचे योगदान होते. टीम इंडिया विश्वविजेती झाली तो दिवस राहुल द्रविड यांचा कार्यकाळाचा शेवटचा दिवस होता. ५० ओव्हरचा वर्ल्ड कप गमावल्यानंतर द्रविड यांनी ७ महिन्यातच टीम इंडियाला विश्वविजेती बनवली.

आयपीएलमधील चार संघ राहुल द्रविड यांना प्रशिक्षकपदाची जबाबदारी देणार असल्याचे म्हटले जात आहे. भारतीय प्रशिक्षकपदाचा कार्यकाळ संपल्याने आता राहुल द्रविड आयपीएलमधील कोणत्यातरी एका संघाची प्रशिक्षकपदाची जबाबदारी सहज स्वीकारू शकतात. आयपीएल २०२५साठी मेगा ऑक्शन होणार असून तेव्हा हा निर्णय घेण्यात येईल असे म्हटले जात आहे.

कोलकाता नाइट रायडर्स, रॉयल चॅलेंजर्स बंगलोर, दिल्ली कॅपिटल्स आणि राजस्थान रॉयल्स यांपैकी कोणत्यातरी एका संघाची हेड कोच म्हणून जबाबदारी द्रविड स्वीकारणार असल्याचे म्हटले जात आहे. आयपीएल २०२५च्या हंगामापूर्वी एक मेगा लिलाव होणार असून त्यावेळेस सर्व संघांची पूर्णपणे पुनर्बांधणी केली जाईल. हे चार संघच का राहुल द्रविड यांना हेड कोच म्हणून घेतील यासंदर्भातील माहिती जाणून घ्या.

रॉयल चॅलेंजर्स बेंगळुरू

या चार संघांमध्ये द्रविड यांना हेड कोच म्हणून संघात समावेश करण्यासाठी रॉयल चॅलेंजर्स बेंगळुरू (आरसीबी) फ्रँचायझी आघाडीवर असल्याचे दिसते. याचे मुख्य कारण म्हणजे संघाचा स्टार खेळाडू विराट कोहलीचे द्रविड यांच्यासोबत चांगले संबंध असल्याचे दिसते. आरसीबी संघाला आतापर्यंत आयपीएलच्या इतिहासात एकही विजेतेपद मिळवता आलेले नाही. अशा स्थितीत द्रविडला आपल्यासोबत सामावून घेऊन विजेतेपदासाठी संघ जोरदार प्रयत्न करेल. आरसीबीलाही कोहलीसोबतच्या चांगल्या बाँडिंगचा फायदा मिळेल आणि संघातील वातावरणही चांगले राहील अशी आशा आहे.

दिल्ली कॅपिटल्स

दिल्ली कॅपिटल्सने ही आतापर्यंत कोणतेही विजेतेपद जिंकलेले नाही. अशा स्थितीत द्रविड यांचा समावेश करून मजबूत संघ उभारण्याची आणि विजेतेपदाची अपेक्षा त्यांच्याकडून असेल. द्रविडने यापूर्वीही दिल्लीचे प्रशिक्षकपद सांभाळले असून रिकी पाँटिंग सध्या दिल्लीचे प्रशिक्षकपद सांभाळत आहे. संघाच्या सततच्या अपयशानंतर पाँटिंग हे पद सोडणार असल्याचे म्हटले जात आहे.

राजस्थान रॉयल्स

द्रविडने यापूर्वी राजस्थान संघाचे प्रशिक्षकपद सांभाळले असून यावेळी ते पुन्हा या संघाची कमान सांभाळतील. राजस्थान हा संघ आपल्या स्टाफ, प्रशिक्षक आणि खेळाडूंना खूप संधी देत असतो अशा परिस्थितीत ते द्रविडकडे प्रशिक्षकपदाची धुरा सांभाळायला देऊ शकतात. मागील हंगामात या संघाने चांगल्या कामगिरीचे प्रदर्शन केले होते.

कोलकाता नाइट रायडर्स

कोलकाता नाइट रायडर्स संघाचे मार्गदर्शक गौतम गंभीर असून त्यांच्या नेतृत्वाखालीच संघाने आयपीएल २०२४ चे विजेतेपद पटकावले होते. गंभीर भारताच्या प्रशिक्षकपदाची धुरा लवकरच हाती घेणार असल्याचा दावा केला जात आहे. अशा परिस्थितीत केकेआर फ्रँचायझी द्रविडकडे जबाबदारी सोपवू शकते.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-07-03T05:57:19Z dg43tfdfdgfd