SURYAKUMAR YADAV: कर्णधारपद हे माझ्यासाठी... सूर्याने नेतृत्वावर पहिल्यांदाच बोलत सर्वांची मनं जिंकली
मुंबई : सूर्यकुमार यादवच्या गळ्यात कर्णधारपदाची माळ पडली आहे. कर्णधारपद मिळाल्यावर सूर्याने आता आपले पहिली पहिली प्रतिक्रीया दिली आहे. सूर्याची ही प्रतिक्रीया चांगलीच व्हायरल झाली आहे.
रोहित शर्माने टी २० क्रिकेटमधून निवृत्ती घेतली. त्यावेळी हार्दिक पंड्या हा उप कर्णधार होता. त्यामुळे हार्दिक भारताचा पुढील टी २० कर्णधार असेल, असे म्हटले जात होते. पण या टी २० कर्णधार पदाच्या शर्यतीत सूर्याची अचानक एंट्री झाली. सूर्या आणि हार्दिक यांच्यामध्ये टी २० कर्णधारपदासाठी चांगलीच चुरस निर्माण झाली होती. पण अखेर सूर्याला भारताचे टी २० संघाचे कर्णधारपद देण्यात आले.
सूर्याने आता टी २० संघाचा कर्णधार झाल्यावर पहिली प्रतिक्रीया दिली आहे. सूर्या म्हणाला की, " आपण सर्वांनी मला जे प्रेम, पाठिंबा आणि शुभेच्छा दिल्या त्याबद्दल मी तुमचा आभारी आहे. गेले काही दिवस माझ्यासाठी स्वप्नवत असेच होते. पण मी खरंच मी सर्वांचा यासाठी आभारी आहे."
सूर्याने आपल्या पोस्टमध्ये पुढे लिहिले आहे की, " आपण देशासाठी खेळत आहोत, ही भावनाच फार मोठी आहे. मी शब्दांमध्ये ही गोष्ट व्यक्त करू शकत नाही. कर्णधारपद हे माझ्यासाठी एक मोठी जबाबदारी घेऊन आले आहे. त्यामुळे मी उत्साहीत आहे. मला आशा आहे की, आपला पाठिंबा आणि आशीर्वाद कायम मिळत राहील. सर्व गोष्टी देवापर्यंत पोहोचतात. गॉड इज ग्रेट."
सूर्याने आतापर्यंत टी २० क्रिकेटमध्ये दमदार कामगिरी केली आहे. सूर्याला आयसीसीचा पुरस्कारही मिळाला आहे. आपल्या फलंदाजीने त्याने सर्वांची मनं जिंकली आहेत. त्याचबरोबर संघातील एक खेळाडू म्हणूनही त्यांचे नाते सर्वांबरोबर चांगले आहे. हीच गोष्ट त्याला कर्णधारपदापर्यंत घेऊन गेली असल्याचे म्हटले जात आहे.
सूर्याला कर्णधार बनवण्यापूर्वी निवड समिती अध्यक्ष अजित आगरकर यांनी संघातील खेळाडूंना त्यांची मतं विचारली होती. त्यावेळी हार्दिकपेक्षा सूर्याला कर्णधारपदासाठी जास्त पसंती मिळाली होती. त्यामुळेच सूर्याला भारताचे कर्णधार बनवण्यात आले असल्याचे म्हटले जात आहे.
अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या. 2024-07-19T18:30:59Z