काळीज तुटलं...खचलेल्या विराटला अनुष्काने स्टँड्समध्येच मारली मिठी, सांत्वन करतानाच फोटो व्हायरल

अहमदाबाद: भारतीय संघाचे पुन्हा एकदा विश्वचषक ट्रॉफी जिंकण्याचे स्वप्न अधुरे राहिले आहे. भारताच्या या पराभवाचा धक्का सर्वच चाहत्यांसोबत भारतीय संघालाही तितकाच बसला आहे. भारतीय संघ आणि जगभरातील कोट्यवधी चाहत्यांप्रमाणेच विराट कोहलीही आयसीसी विश्वचषक २०२३ च्या अंतिम सामन्यात ऑस्ट्रेलियाकडून झालेल्या पराभवामुळे दु:खी झाला होता. विश्वचषकात सर्वाधिक धावा (७६५) केल्याबद्दल कोहलीला टूर्नामेंटमधील सर्वोत्तम खेळाडू म्हणून घोषित करण्यात आले, परंतु त्याच्या अनेक धावाही भारताला चॅम्पियन बनवू शकल्या नाहीत. ट्रेव्हिस हेडने दमदार शतक झळकावून ऑस्ट्रेलियाला भारतावर सहज विजय मिळवून दिला.

भारताच्या ऑस्ट्रेलियाविरुद्धच्या पराभवानंतर विराट कोहलीने त्याची पत्नी अनुष्का शर्माची स्टँडमध्ये भेट घेतली. अनुष्काने निराश कोहलीला मिठी मारून सांत्वन करण्याचा प्रयत्न केला. अनुष्काने कोहलीला मिठी मारतानाचा फोटो सोशल मीडियावर व्हायरल होत आहे. विराट कोहलीला चिअर करण्यासाठी त्याला प्रोत्साहन देण्यासाठी ती कायम उपस्थित असते. पण कोहलीला असं तुटलेलं पाहून तीसुद्धा प्रचंड निराश होती.

कोहलीने अर्धशतक झळकावले, पण

कोहलीने ६० चेंडूत ५४ धावांची खेळी खेळली आणि त्याला ऑस्ट्रेलियन कर्णधार पॅट कमिन्सने बोल्ड केले. कोहलीची विकेट पडली तेव्हाही नरेंद्र मोदी स्टेडियमवर उपस्थित लाखो प्रेक्षक आणि स्वतः अनुष्का थक्क झाली. २४१ धावांचे लक्ष्य राखून बचाव करण्यासाठी आलेल्या भारतीय संघाला ट्रॅव्हिस हेडच्या १२० चेंडूत १३७ धावांच्या खेळीमुळे धक्का बसला आणि ऑस्ट्रेलियाने सहाव्यांदा विश्वचषकाचे विजेतेपद पटकावले.

विराट कोहलीसाठी ही विश्वचषक मोहीम खूपच खास ठरली. विश्वचषक २०२३ मध्ये विराट कोहली जबरदस्त फॉर्मात दिसला. विश्वचषक स्पर्धेतील ११ डावांपैकी ९ डावांमध्ये त्याने अर्धशतके झळकावली असून ५० च्या वर धावांचा टप्पा गाठला. त्याला केवळ दोनदा मोठी धावसंख्या उभारता आली नाही. विराटने या टूर्नामेंटमध्ये एकूण ७६५ धाव केल्या, ज्यात ३ शतके आणि ६ अर्धशतकांचा समावेश आहे. हा एक विश्वविक्रम आहे.

2023-11-20T07:10:14Z dg43tfdfdgfd