त्याच्यात EGO आहे... कसोटी मालिका सुरु होण्यापूर्वी रॉबिन्सन विराट कोहलीला हे काय बोलून गेला

नवी दिल्ली : अफगाणिस्तान टी-२० मालिकेनंतर भारताचा आता घरच्या मैदानावर इंग्लंडशी सामना होणार आहे. २५ जानेवारीपासून दोन्ही देशांदरम्यान ५ सामन्यांची रोमांचक कसोटी मालिका सुरू होत आहे. या मालिकेसाठी चाहत्यांचा उत्साह शिगेला पोहोचला आहे. २०१२ मध्ये इंग्लंडकडून मायदेशात झालेल्या कसोटी मालिकेत भारताचा शेवटचा पराभव झाला होता. इंग्लिश संघाने ती मालिका २-१ ने जिंकली.

त्याच्यात अहंकार आहे - ऑली रॉबिन्सन

फलंदाजीसोबतच भारतीय क्रिकेट संघाचा स्टार फलंदाज विराट कोहली त्याच्या आक्रमकतेसाठीही ओळखला जातो. जेव्हा तो मैदानावर असतो तेव्हा त्याच्यामध्ये एक वेगळीच ऊर्जा दिसते. आता इंग्लंडचा वेगवान गोलंदाज ऑली रॉबिन्सनने विराट कोहलीबाबत मोठे वक्तव्य केले आहे. विराट कोहलीला अहंकार असल्याचे त्याने म्हटले आहे.

रॉबिन्सनने ईएसपीएनक्रिकइन्फोला सांगितले की, 'आपल्याला नेहमीच सर्वोत्तम खेळाडूंविरुद्ध खेळायचे असते. तुम्हाला नेहमीच सर्वोत्तम खेळाडूला आऊट करायचे असते. कोहली त्यापैकीच एक आहे, त्याला खूप अहंकार आहे. विशेषतः गेल्या काही सामन्यात आमच्यात चकमकी झाल्या आहेत, भारतात विराट कोहलीला धावा करण्यासोबतच वर्चस्व गाजवायला आवडते. '

इंग्लंडचा कसोटी संघ ५ सामन्यांच्या कसोटी मालिकेसाठी भारतात येणार आहे. बेन स्टोक्स या संघाचे नेतृत्त्व करणार आहे. जानेवारीमध्ये सुरू होणारी ही कसोटी मालिका मार्चपर्यंत सुरू असेल. त्यानंतर भारतात आयपीएलचे सामने खेळवले जातील.

पहिल्या दोन कसोटींसाठी भारतीय संघ

रोहित शर्मा (कर्णधार), यशस्वी जयस्वाल, केएल राहुल, विराट कोहली, शुभमन गिल, श्रेयस अय्यर, अक्षर पटेल, रविचंद्रन अश्विन, रवींद्र जडेजा, ध्रुव जुरेल, केएस भरत, आवेश खान, जसप्रीत बुमराह, कुलदीप यादव, मोहम्मद सिराज आणि मुकेश कुमार .

इंग्लंडचा संघ कसोटी संघ

बेन डकेट, हॅरी ब्रूक, जो रूट, ऑली पोप, झॅक क्रॉली, बेन स्टोक्स (कर्णधार), रेहान अहमद, बेन फोक्स, जॉनी बेअरस्टो, गस ऍटकिन्सन, जॅक लीच, जेम्स अँडरसन, मार्क वुड, ऑली रॉबिन्सन, शोएब बशीर, टॉम हार्टले .

2024-01-20T05:47:28Z dg43tfdfdgfd