भारतीय संघाला सेटबॅक; हार्दिक पंड्या इतक्या दिवसांसाठी मैदानाबाहेर, NCAमधून आली सर्वात मोठी अपडेट

नवी दिल्ली: भारताचा स्टार ऑलराउंडर हार्दिक पंड्याला वर्ल्डकप २०२३ मधील बांगलादेशविरुद्ध १९ ऑक्टोबर रोजी पुण्यात झालेल्या लढतीत दुखापत झाली होती. सुरुवातीला हार्दिकची दुखापत फार गंभीर नसल्याचे सांगितले गेले. त्यानंतर तो न्यूझीलंडविरुद्धच्या लढतीसाठी संघासोबत धरमशाला येथे न जाता पुण्यातच राहिला आणि नंतर बेंगळुरू येथील राष्ट्रीय क्रिकेट अकादमीत उपचारासाठी गेला. हार्दिक पुढील म्हणजे येत्या रविवारी इंग्लंडविरुद्धच्या लढतीसाठी उपलब्ध असेल अशी चर्चा होती. पण आता तो संपूर्ण वर्ल्डकपला मुकण्याची शक्यता समोर येत आहे.

'टाइम्स ऑफ इंडिया'ने दिलेल्या वृत्तानुसार हार्दिकच्या टाचेला ग्रेड वनची दुखापत झाली आहे. त्यामुळे वर्ल्डकपधील उर्वरीत लढती तो खेळेल का याबाबत गंभीर शंका उपस्थित केली जात आहे. NCAमध्ये वैद्यकीय टीमच्या देखरेखीखाली त्याच्यावर उपचार सुरू आहेत. वैद्यकीय टीमने दिलेल्या माहितीनुसार सुरुवातीला त्याची दुखापत गंभीर नसल्याचे सांगितले जात होते तसे नसल्याचे समोर येत आहे. हार्दिकची दुखापत गंभीर आहे. अकादमी भारतीय संघाच्या उपकर्णधाराला तोपर्यंत मैदानावर पाठवू शकत नाही जोपर्यंत तो पूर्णपणे बरा होत नाही. यासाठी किमान २ आठवड्यांचा कालावधी लागू शकतो.

राष्ट्रीय क्रिकेट अकादमीकडून हार्दिक खेळण्यासाठी उपलब्ध नसले असे भारतीय संघ व्यवस्थापनाला कळवण्यात आले आहे. त्यामुळेच हार्दिक वर्ल्डकपमधील पुढील काही सामने मुकण्याची शक्यता अधिक आहे.

नितीन पटेल यांच्या नेतृत्वाखाली वैद्यकीय टीम एससीएममध्ये हार्दिकच्या दुखापतीवर लक्ष ठेवून आहेत. बांगलादेशविरुद्ध लढती दरम्यान झालेली दुखापत सुरुवातीला किरकोळ वाटत होती पण ती तशी नाहीय हे आता स्पष्ट झाले आहे. हार्दिकला झालेली दुखापत बरी होण्यासाठी किमान २ आठवड्यांचा कालावधी लागणार आहे. जोपर्यंत तो पूर्णपणे बरा होत नाही तोपर्यंत त्याला NACमधून बाहेर पडता येणार नाही. वैद्यकीय टीम लवकरात लवकर त्याला संघात पाठवण्यासाठी प्रयत्न करत आहे, असे सूत्रांनी 'टाइम्स ऑफ इंडिया'ला सांगितले.

हार्दिक पुढील काही सामने खेळू शकणार नसला तरी भारतीय संघ व्यवस्थापन बदली खेळाडूचा सध्या विचार करत नाहीय. तो संघात येण्याची वाट पाहिली जाईल, असे सूत्रांनी सांगितले. हार्दिक पंड्या संदर्भातील कोणतेही अपडेट पुढील आठवड्यात कळू शकतील.

वर्ल्डकपमध्ये सध्या भारतीय संघ सुरक्षित अशा ठिकाणी आहे. संघाने पाच पैकी पाच लढतीत विजय मिळवला असून ते गुणतक्त्यात अव्वल स्थानावर आहेत. सध्याच्या परिस्थितीत हार्दिक बाबतचा निर्णय पुढील आठवड्यात घेतला जाईल, असे स्पष्ट करण्यात आले आहे. तो संघात कधी खेळेल या बाबतचा निर्णय काळजीपूर्वी घेतला जाईल. जर तितकी गरज वाटली तर इंजेक्शन घेऊन हार्दिक मैदानात उतरू शकतो, तेही स्पर्धेच्या अखेरच्या टप्प्यात, असे सूत्रांनी सांगितले.

Read Latest Sports News And Marathi News

2023-10-26T09:28:47Z dg43tfdfdgfd