हॅलो, आयझॅक न्यूटन! विराटच्या फिल्डिंगवर आनंद महिंद्रांना विश्वासच बसेना, ट्वीट करत मागितली मदत
नवी दिल्ली: भारत आणि अफगाणिस्तानमधील तिसरा टी-२० सामना खूपच रोमांचक झाला. यात दोन सुपर ओव्हर, रोहित शर्माचे शतक, रिंकूची तुफानी फलंदाजी आणि विराट कोहलीचे दमदार क्षेत्ररक्षण पाहायला मिळाले. विराट कोहलीचे क्षेत्ररक्षणही विशेष चर्चेचा भाग बनला आहे. आता यावर प्रसिद्ध उद्योगपती आनंद महिंद्रा यांनी ट्विट केले आहे. बेंगळुरू येथे खेळल्या गेलेल्या तिसर्‍या भारत-अफगाणिस्तान टी-२० सामन्यात षटकार रोकण्याच्या विराट कोहलीच्या चमकदार कामगिरीवर त्यांनी ट्विट केले. 'गुरुत्वाकर्षणविरोधी' या घटनेचे स्पष्टीकरण देण्यासाठी भौतिकशास्त्राचा नवा नियम तयार करावा का? असे त्या ट्विटमध्ये विधान केले आहे.
विराटने षटकार रोखला
अफगाणिस्तानच्या फलंदाजीच्या १७ व्या षटकात, करीम जन्नतला भारतीय ऑफस्पिनर वॉशिंग्टन सुंदरकडून एक स्लो चेंडू आला, जो त्याने लाँग-ऑनवर मारण्याचा प्रयत्न केला. जन्नतच्या बॅटवर चेंडू चांगलाच आदळला होता आणि चेंडू सीमापार षटकारासाठी जाणार असे वाटत होते. पण कोहलीने योग्य वेळी उडी मारून चेंडू पकडला आणि सीमा ओलांडण्यापूर्वीच परत मैदानात फेकला. त्याच्या या प्रयत्नाने त्याने ५ महत्त्वाच्या धावा वाचवल्या, ज्या सामना बरोबरीत सुटल्याने सामन्याच्या शेवटी कामी आल्या. विराट कोहलीच्या या फ्लाईंग फिल्डिंगवर कोणाचाही विश्वास बसेना.
विराटचा हा उडी मारतानाचा फोटो शेअर करताना आनंद महिंद्रा यांनी लिहिले, 'हॅलो, आयझॅक न्यूटन! या गुरुत्वाकर्षणविरोधी घडलेल्या घटनेचे स्पष्टीकरण देण्यासाठी तुम्ही आम्हाला भौतिकशास्त्राचा नवीन नियम तयार करण्यास मदत करू शकता का?'
विराट पुन्हा ठरला बेस्ट फिल्डर
या सामन्यात बॅटने विराट कोहली काही विशेष करू शकला नाही. डावाच्या पहिल्याच चेंडूवर त्याला पॅव्हेलियनमध्ये परतावे लागले. पण त्याच्या क्षेत्ररक्षणाने मोठा फरक पडला. पहिल्या सुपर ओव्हरमध्ये त्याने फॉर्मात असलेल्या गुलबदीन नायबला धावबाद केले. विराट कोहलीला मालिकेतील सर्वोत्कृष्ट क्षेत्ररक्षकाचा ड्रेसिंग रुममधील पुरस्कारही मिळाला. टीम इंडियाचे क्षेत्ररक्षण प्रशिक्षक टी दिलीप यांनी विराटला मेडल प्रदान केले. इंदूर येथे झालेल्या मालिकेतील दुसऱ्या सामन्यात तो चांगल्या लयीत फलंदाजी करत होता. विराट २५ जानेवारीपासून इंग्लंडविरुद्धच्या कसोटी मालिकेत खेळताना दिसणार आहे.
2024-01-19T07:01:00Z dg43tfdfdgfd