CSK VS KKR: मॅच सुरू होण्याआधी गौतम गंभीरने दिला सर्वांना धक्का; धोनीबद्दल बोलताना म्हणाला, तो ज्या ठिकाणी...

नवी दिल्ली: आयपीएल २०२४ मध्ये आज सोमवारी चेन्नई सुपर किंग्ज आणि कोलकाता नाइट रायडर्स यांच्यात लढत होत आहे. चेन्नई संघात महेंद्र सिंह धोनी आहे तर केकेआरकडून मेंटॉर म्हणून गौतम गंभीर आहे. चेन्नई संघाने ४ पैकी २ लढती जिंकल्या तर २ गमावल्या आहेत. ते गुणतक्त्यात चौथ्या क्रमांकावर आहेत. केकेआरने ३ पैकी ३ लढती जिंकल्या असून ते दुसऱ्या क्रमांकावर आहेत. या लढतीच्या आधी गंभीरने धोनीबद्दल महत्त्वाचे वक्तव्य केले आहे.

गंभीरने केलेल्या वक्तव्याची नेहमीच चर्चा होत असते. याआधी त्याने धोनीबद्दल केलेल्या वक्तव्यांची चर्चा झाली होती आणि चाहत्यांना असे वाटते की तो धोनीवर टीका करतो. पण आयपीएलच्या या लढतीआधी गंभीरने धोनीचे कौतुक केले आहे.

धोनीबद्दल बोलताना गंभीर म्हणाला, धोनी भारताचा सर्वात यशस्वी कर्णधार आहे. मला वाटत नाही की धोनी ज्या उंचीवर पोहोचला आहे, त्या ठिकाणी अन्य कोणी पोहोचू शकेल. आयसीसीच्या ३ ट्रॉफी जिंकणे, परदेशात मालिका जिंकणे, कसोटी जिंकणे. यातील सर्वात महत्त्वाचे म्हणजे ICCच्या ३ ट्रॉफी जिंकणे होय.

आयपीएलमध्ये मी धोनीविरुद्धच्या प्रत्येक मॅचचा आनंद घेतला आहे. कारण तुम्हाला माहिती असते की, रणनितीबाबत तुम्ही त्याला मात देऊ शकत नाही. याबाबत तो खुप चांगला आहे. धोनी जोपर्यंत क्रीझवर असतो तोपर्यंत मॅच कधीही फिनिश करू शकतो. मग एका ओव्हरमध्ये २० धावा करायच्या असतील तरी त्या शक्य होतात.

२०१२ साली गंभीरच्या नेतृत्वाखाली केकेआरने आयपीएलचे विजेतेपद मिळवले होते. तेव्हा अंतिम सामन्यात गंभीरने धोनी नेतृत्व करत असलेल्या चेन्नईचा पराभव केला होता. गंभीरने धोनीच्या आयपीएल जेतेपदाच्या हॅट्रिकचे स्वप्न भंग केले होते.

गंभीरने धोनीच्या कधीही हार न मानण्याच्या क्षमतेचे कौतुक केले. विरोधी संघ त्याची मॅच कधीही फिनिश करण्याच्या स्किलपासून नेहमी सावध असते. चेन्नई एक असा संघ आहे ज्याच्याविरुद्ध शेवटचा चेंडू टाकेपर्यंत तुमचा विजय पक्का नसतो.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-08T12:59:32Z dg43tfdfdgfd