नवी दिल्ली(विनायक राणे): ‘बॅडमिंटनपटूऐवजी टेनिसपटू झाले असते, तर खेळाडू म्हणून कदाचित आणखी यश मिळवू शकले असते’, असे भारताची ऑलिम्पिक पदकविजेती बॅडमिंटनपटू साईना नेहवालला वाटते आहे. राष्ट्रपती भवनातील एका कार्यक्रमात तिने या भावना व्यक्त केल्या. तसेही बॅडमिंटनपटू म्हणूनही साईनाची कामगिरी निश्चितच मोठी आहे. तिने चीनच्या बॅडमिंटनमधील साम्राज्याला खिंडार पाडत जागतिक क्रमवारीत अव्वल क्रमांक पटकावला होता. तसेच पॉवरलिफ्टर कर्णम मल्लेश्वरी यांच्यानंतर वैयक्तिक ऑलिम्पिक पदकाची कमाई करणारी ती भारताची दुसरी महिला खेळाडूही ठरली.
‘माझ्या पालकांनी मला बॅडमिंटनऐवजी टेनिसच्या प्रशिक्षणाला पाठवले असते तर बरे झाले असते, असे कधीकधी वाटते. टेनिसपटूला आवश्यक असणारी ताकद माझ्यात होती, तसेच बॅडमिंटनच्या तुलनेत तिथे पैसाही जास्त आहे’, असे ३४ वर्षीय साईनाने नमूद केले.
साईनाकडे बघून भारताच्या अनेक बॅडमिंटनपटूंना प्रेरणा लाभली. मात्र जेव्हा साईनाने सुरुवात केली तेव्हा भारताकडून महिला बॅडमिंटनमध्ये प्रेरणा घेता येईल, अशी नावे नव्हती. ‘मी सुरुवात केली तेव्हा माझ्यासमोर आदर्श अशा खेळाडू नव्हत्या. मला अमुक एकीप्रमाणे जगात अव्वल व्हायचे आहे किंवा एखादी प्रमाणे ऑलिम्पिक पदक जिंकायचे आहे, असे बोलता येईल अशी परिस्थितीही नव्हती. माझ्याआधी भारतीय बॅडमिंटनमध्ये कुणाला असे करताना मी पाहिले नव्हते’, अशी आठवण साईनाने सांगितले.
साईनाने लंडन ऑलिम्पिकमध्ये ब्राँझ पदकाची कमाई केली, तर जागतिक अजिंक्यपद स्पर्धेतही तिने ब्राँझ आणि रौप्य अशी दोन पदके जिंकली आहेत. तसेच राष्ट्रकुल क्रीडा स्पर्धेत साईनाने दोन सुवर्ण पदकांची कमाईदेखील केली आहे. तरुणांनी व्यावसायिक खेळाडू व्हावे, क्रीडाक्षेत्राकडे कारियरची संधी म्हणून बघावे, याबाबत साईना आग्रही असते. ‘लहान मुलांनी खेळ खेळावेत, असे माझे कायम सांगणे असते. एकीकडे चीनकडून ६०-७० पदकांची कमाई होत असते आणि आपण फक्त तीन, चार पदके पटकावतो’, असे साईना नमदू करते.
‘खासकरून मुलींनी पुढे यावे, फिटनेस उंचवावा आणि क्रीडाक्षेत्रात नाव कमवावे, असे मला मनापासून वाटते. आताच्या आणि पुढील पिढ्यांच्या मार्गदर्शनासाठी आम्ही आहोत. जागतिक क्रमवारीत अव्वल क्रमांकावर पोहोचलेले खेळाडू आपल्याकडे आहेत. ऑलिम्पिक विजेते भारताच्या मातीत घडले आहेत अन् त्यांच्या पावलावर पाऊल टाकत यापुढेही गुणवत्ता येत राहील’, असे साईना आत्मविश्वासाने म्हणते.
आपल्यात गुणवत्तेची पोकळी होती, असे साईना मोठ्या मनाने कबुल करते. त्याची भरपाई आपण कठोर मेहनत करून भरून काढली, असेही ती प्रामाणिकपणे सांगते. ‘माझ्यात बॅडमिंटनची नैसर्गिक गुणवत्ता वैगरे नव्हती. मात्र मला मेहनत करणे खूप आवडते. त्यामुळे खेळातील प्रत्येक बारकावे अवगत करण्यासाठी मी तासंतास सराव केला आहे. एखादा गुणवान खेळाडू खेळातील नवी गोष्ट शिकण्यासाठी शंभरवेळा सराव करत असले, तर मला सरावात तीच गोष्ट हजारवेळा करावी लागत होती. प्रशिक्षकांनाही माझी हार न मानण्याची वृत्ती खूप आवडायची’, असे साईनाने सांगितले.
अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या. 2024-07-12T04:47:48Z dg43tfdfdgfd