T20 WORLD CUP: अनोख्या स्टाइलने जाहीर केला टी-२० वर्ल्डकपसाठीचा संघ; न्यूझीलंड टीमच्या घोषणेचा व्हिडिओ होतोय व्हायरल
वेलिंग्टन: २ जूनपासून सुरू होणाऱ्या आयसीसी टी-२० वर्ल्डकपसाठी न्यूझीलंडने संघाची घोषणा केली आहे. ICCने वर्ल्डकपसाठी संघ जाहीर करण्याची मुदत १ मेपर्यंत दिली आहे. वर्ल्डकप खेळणाऱ्या संघांपैकी न्यूझीलंड हा पहिला संघ असा ठरला आहे ज्यांनी १५ सदस्यीय संघाची घोषणा केली.
वेस्ट इंडिज आणि अमेरिकेत होणाऱ्या या वर्ल्डकपसाठी न्यूझीलंडचा कर्णधार केन विलियमसन असेल. त्याचा खेळाडू म्हणून सहावा तर कर्णधार म्हणून चौथा टी-२० वर्ल्डकप असेल. गेल्या ३ स्पर्धेत न्यूझीलंडचा संघ सेमीफायनलपर्यंत पोहोचला होता तर २०२१ साली त्यांनी अंतिम फेरीत धडक मारली होती.
संघ जाहीर करताना न्यूझीलंडने अनोखी पद्धत वापरली. न्यूझीलंडचा वर्ल्डकपसाठीचा संघ मटिल्डा आणि एंगस या दोन मुलांनी जाहीर केला. याचा व्हिडिओ न्यूझीलंड बोर्डाने सोशल मीडियावर शेअर केला. याआधी वनडे वर्ल्डकपच्या वेळी त्यांनी क्रिकेटपटूंच्या पत्नी, मुले आणि गर्लफ्रेंडसह संघाची घोषणा केली होती.
न्यूझीलंडच्या वर्ल्डकप संघात अनेक मोठे बदल करण्यात आले आहेत. दुखापतीमुळे आयपीएल २०२४चा हंगाम खेळू न शकलेला डेवॉन कॉन्वेचा संघात समावेश झालाय. कॉन्वे आयपीएलमध्ये चेन्नई सुपर किंग्जकडून खेळतो. याच बरोबर टीम साउदी आणि ट्रेंड बोल्ट यांचा संघात समावेश करण्यात आला आहे. साउदीचा हा सातवा टी-२० वर्ल्डकप असेल. जलद गोलंदाज काइल जेमिसन आणि ऑलराउंडर एडम मिल्ने हे दुखापतीमुळे वर्ल्डकप खेळू शकणार नाहीत.
खराब कामगिरीमुळे विल ओ, टॉम लॅथम, टिम सीफर्ट आणि विल यंग यांना संधी दिली गेली नाही. त्याच बरोबर सलामीवीर कॉलिन मु्न्नोला स्थान मिळू शकले नाही.
युवा फलंदाज रचिन रविंद्रला संधी मिळाली असून गोलंदाजीत मॅट हेन्नरीचा समावेश करण्यात आला आहे. न्यूझीलंडचे कोच गॅरी स्टीड यांनी निवड झालेल्या खेळाडूंचे अभिनंदन केले आहे. वर्ल्डकपमध्ये न्यूझीलंडची पहिली मॅच ७ जून रोजी अफगाणिस्तानविरुद्ध होणार आहे.
टी-२० वर्ल्डकपसाठीचा न्यूझीलंडचा संघ
केन विलियमसन (कर्णधार), फिन एलन, ट्रेंट बोल्ट, मायकल ब्रेसवेल, मार्क चॅपमॅन, डेवोन कॉन्वे, लॉकी फर्ग्यूसन, मॅट हेन्नरी, डेरिल मिशेल, जिमी निशम, ग्लेन फिलिप्स, रचिन रविंद्र, मिशेल सेंटनर, इश सोढी, टिम साउदी
अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या. 2024-04-29T10:39:10Z dg43tfdfdgfd