गांगुली आणि पॉन्टिंग मैदानातच अंपायरला भिडले, चिटींग झाल्याचे सांगताना व्हिडिओ झाला व्हायरल

नवी दिल्ली : दिल्ली कॅपिटल्सच्या सामन्यात एक धक्कादायक घटना पाहायला मिळाली. कारण सौरव गांगुली आणि रिकी पॉन्टिंग हे दोघेही सामना सुरु असताना पंचांशी भिडल्याचे पाहायला मिळाले. या गोष्टीचा व्हिडिओ सध्याच्या घडीला चांगलाच व्हायरल झाला आहे.

आयपीएलमध्ये यापूर्वी विराट कोहली आणि गौतम गंभीर यांच्यातील वाद गाजला होता. त्यानंतर या आयपीएलमध्ये पहिल्यांदाच असा वाद झाल्याचे पाहायला मिळाले. दिल्ली कॅपिटल्सविरुद्धच्या सामन्यात राजस्थान रॉयल्सच्या संघाने नियम पाळला नाही, त्यांनी चिटिंग केली, असे पॉन्टिंग आणि गांगुली यांचे म्हणणे होते. हे दोघेही मैदानात सामना सुरु असताना पंचांशी वाद घालत होते. पॉन्टिंगने तर यावेळी दिल्ली कॅपिटल्सला फ्री हिट द्यावा, अशी मागणीही केली.

नेमकं घडलं तरी काय, जाणून घ्या...

दिल्ली आणि राजस्थान यांच्यात हा सामना होता. या सामन्यासाठी जेव्हा राजस्थानने आपला संघ जाहीर केला, तेव्हा त्यामध्ये जोस बटलर, ट्रेंट बोल्ट आणि शिमरॉन हेटमायर यांचा समावेश होता. त्यानंतर हेटमायर हा पेव्हेलियनमध्ये गेला आणि त्याच्या जागी नांद्रे बर्गरला इम्पॅक्ट प्लेअर म्हणून संघात स्थान देण्यात आले. तोपर्यंत सारे आलबेल होते. पण जेव्हा दिल्लीच्या डावाचा दुसरा चेंडू झाला त्यावेळी राजस्थानचा कर्णधार संजू सॅमसनने शुभम दुबेच्या जागी रोवमन पॉवेलला संघात बोलावले. त्यानंतर दिल्लीच्या डग आऊटमध्ये बसलेला पॉन्टिंग हा चांगलाच भडकल्याचे पाहायला मिळाले. पॉन्टिंग यावेळी तिथे उपस्थित असलेल्या चौथ्या पंचांकडे गेला आणि त्यांनी मैदानात जे घडत आहे ते नियमाला धरून नसल्याचे पंचांना सांगितले. पॉन्टिंग हा पंचांना सांगत असताना काही वेळात गांगुलीनेही चौथ्या पंचांना याबाबत जे काही घडत आहे, त्यावर प्रश्नचिन्ह उपस्थित केले आणि त्यामुळे आता पुढे काय होणार याची उत्सुकता सर्वांना लागली होती. त्यावेळी तिसऱ्या पंचांनी या दोघांना आयपीएलचा नियम काय आहे, ते समजावून सांगितले.

राजस्थान रॉयल्सने जेव्हा आपला संघ जाहीर केला तेव्हा त्यामध्ये तीन परदेशी खेळाडू होते. पण जेव्हा राजस्थानचा संघ गोलंदाजी करत होता तेव्हा त्यांच्या संघात चार परदेशी खेळाडू खेळत होता. या गोष्टीवर पॉन्टिंग चांगलाच भडकला होता आणि या गोष्टी नियमाला धरून नसल्याचे सांगत होते. गांगलीही पंचांना याबाबत काही गोष्टी सांगत होता. पण एकावेळी सामन्यात चार परदेशी खेळाडू खेळू शकतात, हे दोघेही विसरल्याचे पाहायला मिळाले.

पॉन्टिंग आणि गांगुली यावेळी चौथ्या पंचांवर चांगलेच भडकले होते. पण त्यानंतर आयपीएलचा नियम काय आहे, हे आता सर्वांच्या समोर आले आहे. त्यामुळे त्यांचे वागणे नियमाला धरून होते का, असा प्रश्न आता विचारला जात आहे.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-03-29T07:35:59Z dg43tfdfdgfd