रवींद्र जडेजा ठरला चेन्नईच्या विजयाचा शिल्पकार, पराभवाची धुळ चारत घेतला पंजाबचा बदला

धरमशाला : रवींद्र जडेजाच्या अष्टपैलू कामगिरीच्या जोरावर चेन्नई सुपर किंग्सला पंजाब किंग्सवर दमदार विजय मिळवता आला. जडेजा हा या सामन्यात चेन्नईसाठी तारणहार ठरला. कारण संघाचा डाव अडचणीत आला असताना त्याने ४३ धावांची खेळी साकारली होती. त्यानंतर जडेजाने तीन विकेट्स मिळवले आणि चेन्नईच्या विजयाचा तो शिल्पकार ठरला. या विजयासह चेन्नईने पंबाजवर गेल्या सामन्यातील पराभवाचा बदला घेतला आहे. चेन्नईने या सामन्यात पंजाब किंगस्वर २८ धावांनी विजय साकारला.

चेन्नईच्या १६८ धावांचा पाठलाग करणाऱ्या पंजाब किंग्सच्या संघाला तुषार देशपांडेने पहिल्याच षटकात दोन धक्के दिले. तुषारने प्रथम फॉर्मात असलेल्या जॉनी बेअरस्टोला बाद केले, त्याला सात धावाच करता आल्या. त्यानंतर तुषारने याच षटकात रिली रोसूलाही बाद केले, रिलीला यावेळी भोपळाही फोडता आला नाही. त्यानंतर काही काळ प्रभसिमरन सिंग (३०) आणि शशांक सिंग (२७) यांनी काही काळ संघाला सावरण्याचा प्रयत्न केला खरा, पण त्यांना मोठी खेळी साकारता आली नाही. जडेजाने प्रभसिमरनला बाद केले आणि संघाला मोठे यश मिळवून दिले. जडेजाने त्यानंतर पंजाबचा कर्णधार सॅम करनलाही बाद केले आणि संघासाठी विजयाचे दार उघडले. त्यामुळे पंजाबचा संघ हा सामना जिंकू शकला नाही.

पंजाबने चेन्नईला प्रथम फलंदाजीला पाचारण केले आणि त्यानंतर अजिंक्य रहाणेच्या रुपात पहिला धक्का दिला. अजिंक्य यावेळी ९ धावाच करू शकला. पण त्यानंतर ऋतुराज गायकवाड आणि डॅरिल मिचेल यांची चांगलीच जोडी जमली. या जोडीने दुसऱ्या विकेटसाठी ५७ धावांची भागीदारी रचली. ऋतुराज पुन्हा मोठी खेळी साकारणार का, असे वाटत होते. पण यावेळी राहुल चहरने त्याला बाद केले आणि चेन्नईला मोठा धक्का दिला. ऋतुराजने यावेळी २१ चेंडूंत ३२ धआवा केल्या. ऋतुराज बाद झाल्यावर फलंदाजीला आला तो शिवम दुबे. पण दुबे यावेळी पहिल्याच चेंडूवर बाद झाला. त्यानंतर डॅरिल मिचेलही लवकर बाद झाला आणि एकामागून एक चेन्नईच्या संघाला तीन धक्के बसले. पण यामधून संघाला बाहेर काढले ते रवींद्र जडेजाने.

चेन्नईच संघ अडचणीत असताना जडेजाला संघाला सावरले. जडेजाने दमदार फलंदाजीचा नमुना पेश केला आणि चेन्नईच्या संघाला सन्मानजनक धावसंख्या उभारून देण्यात मोठी भूमिका बजावली. जडेजाने यावेळी २६ चेंडूंत तीन चौकार आणि दोन षटकारांच्या जोरावर ४३ धावांची खेळी साकारली. त्यामुळे चेन्नईच्या संघाला १६७ धावांपर्यंत मजल मारता आली. महेंद्रसिंग धोनी यावेळी नवव्या स्थानावर फलंदाजीला आला आणि पहिल्याच चेंडूवर क्लीन बोल्ड झाला.

चेन्नईचे हे आव्हान माफक वाटत असले तरी त्यांच्या गोलंदाजांनी अचूक आणि भेदक मारा करत सामना चांगलाच रंगतदार केला होता.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-05-05T14:03:14Z dg43tfdfdgfd