हार्दिकला मारलेल्या सलग ३ षटकारानंतर त्या चेंडूचे काय झाले? वानखेडेवरील लढतीचा सर्वात खास ठरला हा क्षण

मुंबई: आयपीएल २०२४ मध्ये महेंद्र सिंह धोनी शानदार फॉर्ममध्ये दिसत आहे. रविवारी चेन्नई सुपर किंग्जविरुद्ध झालेल्या लढतीत मुंबई इंडियन्सचा २० धावांनी पराभव झाला. वानखेडे मैदानावर झालेल्या या लढतीत धोनी पहिल्या डावाच्या अखेरच्या षटकात मैदानावर फलंदाजीला आला. त्याने हार्दिक पंड्याच्या अखेरच्या ४ चेंडूवर ३ षटकार मारले. धोनीने ४ चेंडूत २० धावा केल्या आणि चेन्नईने २०७ धावांचे टार्गेट मुंबईला दिले. उत्तरादाखल रोहित शर्माच्या नाबाद १०५ धावांच्या शतकी खेळीनंतर देखील मुंबईला २० षटकात १८६ धावा करता आल्या.

या सामन्यात रोहितच्या शतकासोबत चेन्नईचा कर्णधार ऋतुराज गायकवाड आणि शिवम दुबे यांच्या अर्धशतकाचे कौतुक होत असेल तरी पहिल्या डावात ४ चेंडू खेळून धमाका करणाऱ्या धोनीच्या खेळीची सर्वाधिक चर्चा होत आहे. धोनीच्या फलंदाजीपेक्षा खरी चर्चा होत आहे ती त्याने केलेल्या एका कृतीची होय.

चेन्नईचा डाव संपल्यानंतर धोनी ड्रेसिंग रुमकडे जात असताना पायऱ्यांवरून जात असताना त्याला तेथे चेंडू दिसला. हा तोच चेंडू होता ज्यावर त्याने हार्दिकला षटकार मारला होता. धोनीने हा चेंडू उचलला आणि प्रेक्षकांच्यात असलेल्या एका मुलीला दिला. धोनीचा हा आयपीएलचा अखेरचा हंगाम असू शकतो. ४२ वर्षीय धोनी करिअरच्या अखेरच्या आयपीएल हंगामात विजय मिळवण्याचा प्रयत्न करेल. धोनीने चेंडू गिफ्ट केल्याच्या घटनेने संपूर्ण चाहत्यांचे मन जिंकले. या घटनेचा फोटो चाहते सोशल मीडियावर शेअर करून त्यावर प्रतिक्रिया देत आहेत.

सामना झाल्यानंतर चेन्नईचा कर्णधार ऋतुराज गायकवाडने धोनीचे कौतुक केले. तो म्हणाला, विकेटकीपरने ३ षटकार मारल्याने आम्हला मोठी मदत मिळाली. या ३ षटकारांनी विजयाचे अंतर निश्चित केले. अशा प्रकारच्या मैदानावर नेहमची १० ते १५ अतिरिक्त धावांची गरज असते. बुमराहने मधळ्या षटकात खुप चांगली गोलंदाजी केली. पण मला वाटते की, आम्ही गोलंदाजीसोबत आमची योजना खुप चांगल्या पद्धतीने राबवली.

चेन्नईच्या गोलंदाजांचे कौतुक करताना ऋतुराजने मथीसा पथिरानाचा उल्लेख केला. त्याने चांगली गोलंदाजी केली. त्याच्या यॉर्करमुळे फायदा झाला. त्याच बरोबर तुषार देशपांडे आणि शार्दुल ठाकूर यांनी उत्तम कामगिरी केली. अजिंक्यच्या फलंदाजीत थोडी अडचण वाटत होती म्हणून त्याला सलामीला पाठवले, असे ऋतुराज म्हणाला.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-15T09:36:16Z dg43tfdfdgfd