ASHWIN WORLD RECORD: अश्विनचा ऐतिहासिक वर्ल्ड रेकॉर्ड; क्रिकेटच्या इतिहासातील पहिलीच घटना, १४७ वर्षात प्रथमच घडले

धरमशाला: इंग्लंडविरुद्धच्या पाचव्या कसोटीत भारताने १ डाव आणि ६४ धावांनी विजय मिळवला. यासह टीम इंडियाने ५ सामन्यांची कसोटी मालिका ४-१ अशी जिंकली. भारताच्या या विजयात अनेक मोठे विक्रम झाले. मालिकेतील पहिली मॅच गमावल्यानंतर मालिका ४-१ने जिंकणारा भारत हा कसोटी क्रिकेटच्या इतिहासातील ११२ वर्षानंतरचा पहिला संघ ठरला आहे. या भारतीय संघातील काही खेळाडूंनी देखील काही विक्रम केले.

इंग्लंडविरुद्धची पाचवी कसोटी ही आर अश्विनची १००वी कसोटी होती.या सामन्यात त्याची कामगिरी कशी होते याकडे सर्वांचे लक्ष होते आणि नेहमी प्रमाणे अश्विनने कोणाला निराश केले नाही. या सामन्यात अश्विनने पहिल्या डावात ४ तर दुसऱ्या डावात ५ विकेट घेतल्या.

अश्विनने १००व्या कसोटीत त्याने ९ विकेट घेतल्या. १००व्या कसोटीत ५ पेक्षा अधिक विकेट घेण्याची कामगिरी मुथय्या मुरलीधरन, शेन वॉन, कपील देव आणि अनिल कुंबळे यांनी केली होती. अश्विनने १२८ धावा देत ९ विकेट घेतल्या. १००व्या कसोटीत सर्वोत्तम गोलंदाजीचा विक्रम त्याच्या नावावर झाला आहे. हा विक्रम आधी श्रीलंकेच्या मुरलीधरनच्या नावावर होता. त्याने १४१ धावा देत ९ विकेट घेतल्या होत्या.

इतक नाही तर या सामन्यात अशी कामगिरी केली जी क्रिकेटच्या इतिहासात एकाही गोलंदाजाला करता आली नाही. अश्विनने त्याच्या करिअरच्या पहिल्या कसोटीत ५ विकेट घेतल्या होत्या आणि आता १००व्या कसोटीत देखील ५ विकेट मिळवल्या. कसोटी क्रिकेटच्या इतिहासात अशी कामगिरी करणारा तो पहिला गोलंदाज आहे.

इंग्लंडविरुद्ध सर्वाधिक विकेट घेणाऱ्या भारतीय गोलंदाजांच्या यादीत अश्विन आता अव्वल स्थानी पोहोचला आहे. इंग्लंडविरुद्ध त्याने आतापर्यंत ११४ विकेट घेतल्या आहेत. अश्विनने ऑस्ट्रेलियाविरुद्ध देखील सर्वाधिक ११४ विकेट घेतल्या आहेत.

कसोटीत सर्वाधिक वेळा एका डावात ५ विकेट घेण्याच्या यादीत अश्विन चौथ्या स्थानावर पोहोचला आहे. आज त्याने अनिल कुंबळेच्या ३५ वेळा ५ विकेट घेण्याचा विक्रम मागे टाकला. या यादीत लंकेचा मुथय्या मुरलीधरन (६७ वेळा एका डावात ५ विकेट) अव्वल स्थानी आहे. शेन वॉन (३७ वेळा) दुसऱ्या, रिचर्ज हेडली (३६ वेळा) तिसऱ्या स्थानावर आहेत.

१००व्या कसोटीत एका डावात पाच किंवा त्यापेक्षा जास्त विकेट घेणारा तो चौथा गोलंदाज ठरला आहे. याआधी शेन वॉन, अनिल कुंबळे आणि मुथय्या मुरलीधरन यांनी अशी कामगिरी केली होती.

2024-03-09T14:02:00Z dg43tfdfdgfd