CSK VS KKR: कोणी विचार केला नव्हता मैदानावर असं काही होईल; क्रिकेटपटूवर कान बंद करण्याची वेळ आली

चेन्नई: आयपीएल २०२४ मध्ये चेन्नई सुपर किंग्जने सोमवारी कोलकाता नाइट रायडर्सचा विजय रथ रोखला. चेपॉकवर झालेल्या लढतीत चेन्नईने १९ चेंडू आणि ७ विकेट राखून विजय साकारला. आयपीएलमधील सर्वात मोठा फॅन फॉलोइंग असलेल्या चेन्नईचा संघाची मॅच कुठेही असो चाहत्यांचा त्यांना फुल्ल सपोर्ट मिळतो. चेन्नईची मॅच जर घरच्या मैदानावर असेल तर मग स्टेडियमवर चाहत्यांची लाट येते.

चेन्नई संघाचे घरचे मैदान असलेल्या चेपॉकवर केकेआरविरुद्धच्या लढतीत अशीच मोठी गर्दी पहायला मिळाली. याचे सर्वात मोठे कारण म्हणजे महेंद्र सिंह धोनी होय. आयपीएल २०२४च्या सुरुवातीच्या ४ पैकी दोन लढती चेपॉकवर झाल्या. ज्यात धोनी फलंदाजीला आला नाही.

कोलकाता नाइट रायडर्सविरुद्धच्या लढतीत महेंद्र सिंह धोनी फलंदाजीला आला.धोनी फलंदाजीला आला तेव्हा चेन्नईला विजयासाठी फक्त ३ धावांची गरज होती. वैभर अरोडाने शिवम दुबेला बोल्ड केले आणि त्यानंतर धोनी फलंदाजीला आला. धोनीला मॅचमध्ये फलंदाजी करतानाचे स्वप्न पूर्ण झाल्याने चाहत्यांनी मैदान डोक्यावर घेतले. या मॅचमध्ये भलेही धोनीने ३ चेंडूत नाबाद १ धावा घेतली असली तरी चाहत्यांना तो मैदानावर आला हेच मोठे होते.

धोनी जेव्हा मैदानावर फलंदाजीला आला तेव्हा चेपॉकवर धोनी, धोनी असा आवाज येत होता. चाहत्यांचा जोश इतका होता की केकेआरचा ऑलराउंडर आंद्रे रसेलला कान बंद करण्याची वेळ आली. धोनी फलंदाजीला येत असताना रसेल सीमा रेषेवर क्षेत्ररक्षण करत होता. या घटनेचा व्हिडिओ सोशल मीडियावर चर्चेत आलाय. सामना झाल्यानंतर रसेल म्हणाला धोनी हा जगातील असा क्रिकेटपटू आहे ज्याच्यावर सर्वाधिक प्रेम केले जाते.

चेन्नई सुपर किंग्जची या हंगामातील ही पाचवी लढत होती. यापैकी ३ लढतीत त्यांनी विजय मिळवला आहे. चेन्नईने आतापर्यंतचे सर्व विजय घरच्या मैदानावर मिळवले आहेत. बाहेर झालेल्या दोन लढतीत त्यांचा पराभव झाला. गुणतक्त्यात चेन्नईचा संघ ६ गुणांसह चौथ्या स्थानावर आहे. अव्वल स्थानी राजस्थान (८ गुण), दुसऱ्या स्थानावर केकेआर तर तिसऱ्या स्थानावर लखनौचा संघ आहे.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-09T10:21:30Z dg43tfdfdgfd