CSK VS RCB : अजिंक्य रहाणेचा फिटनेस पाहिला का? अफलातून फिल्डिंग करत विराट कोहलीला केले बाद

चेन्नई: आयपीएल २०२४चा थरार सुरू झालाय. चेन्नई सुपर किंग्ज आणि रॉयल चॅलेंजर्स बेंगळुरू यांच्यात पहिली लढत सुरू आहे. टॉस जिंकून आयसीबीचा कर्णधार फाफ डुप्लेसिसने फलंदाजी करण्याचा निर्णय घेतला. फाफने संघाला धमाकेदार सुरुवात करून दिली. पण त्यानंतर चेन्नईच्या गोलंदाजांनी कमाल केली. एका पाठोपाठ एक महत्त्वाच्या विकेट घेत त्यांनी बेंगळुरूला बॅकफुटवर ढकलले.

मुस्तफिजुर रहमानने त्याच्या पहिल्या ओव्हरमध्ये फाफ आणि रजत पाटीदार यांना बाद केले. त्यानंतर ग्लेन मॅक्सवेल शून्यावर माघारी परतला. पहिल्या ३ विकेट पडल्यानंतर विराट कोहलीकडे डाव सावरण्याची जबाबदारी होती. विराट लय पकडत आहे असे वाटत असताना अजिंक्य रहाणेने अफलातून फिल्डिंग करत त्याला बाद केले.

आरसीबीच्या १२व्या षटकात मुस्तफिरच्या दुसऱ्या चेंडूवर विराटने डीप मिड विकेटच्या दिशने मोठा शॉट खेळला. शॉट पाहिल्यावर तो षटकार जाईल असे वाटत होते. पण ३५ वर्षीय अजिंक्य रहाणेने कमाल दाखवली. अजिंक्य पळत आला आणि जमिनीवर घसरून चेंडू पकडला. जेव्हा त्याच्या लक्षात आले की तो सीमा रेषेकडे जात आहे तेव्हा त्याने जवळ उभ्या असलेल्या रचिन रविंद्रकडे चेंडू टाकला आणि विराटला बाद केले. विराटने २० चेंडूत २१ धावा केल्या. ज्यात एका षटकाराचा समावेश होता.

स्कोअरबोर्डवर विराटचा कॅच रचिनने पकडला असे दिसत असले तरी त्याचे सर्व श्रेय अजिंक्यला जाते. त्याच्या या फिल्डिंगचे सर्वजण कौतुक करत आहेत. विराटच्या पाठोपाठ ग्रीन देखील १८ धावा करून माघारी परतला. त्यानंतर अजुन रावत आणि दिनेश कार्तिक या जोडीने संघाला १७३ धावांपर्यंत पोहोचवले. अजुनने २५ चेंडूत ४ चौकार आणि ३ षटकारांस ४८ धावा केल्या. तर कार्तिकने २६ चेंडूत ३ चौकार आणि २ षटकारांसह नाबाद ३८ धावांची खेळी केली. चेन्नईकडून मुस्तफिजुरने सर्वाधिक ४ विकेट घेतल्या.

2024-03-22T17:35:45Z dg43tfdfdgfd