DC VS SRH: कुलदीप यादवने दिल्ली कॅपिटल्सची लाज वाचवली; नाही तर हैदराबादने उभा केला असता ३४८ धावांचा एव्हेस्ट

दिल्ली: सनरायझर्स हैदराबाद संघाने आयपीएल २०२४च्या हंगामात एका पाठोपाठ एक धावांचा डोंगर उभा करण्याचे ठरवलेले दिसते. दिल्ली कॅपिटल्सविरुद्धच्या सामन्यात पुन्हा एकदा विक्रमी धावसंख्या उभ्या केल्या. या हंगामात हैदराबादने तिसऱ्यांदा २५०च्या पुढे धावसंख्या उभी केली. प्रथम फलंदाजी करणाऱ्या हैदराबाद संघाने २० षटकात ७ बाद २६६ धावा केल्या. ही धावसंख्या ३४८च्या आसपास झाली असती जर दिल्लीच्या मदतीला चायनामन गोलंदाज कुलदीप यादव आला नसता तर...

दिल्लीचा कर्णधार ऋषभ पंतने टॉस जिंकून प्रथम गोलंदाजी करण्याचा निर्णय घेतला आणि नंतर पश्चाताप करण्या पलिकडे त्याच्या हातात काहीच शिल्लक राहिले नाही. अभिषेक शर्मा आणि ट्रेव्हिस हेड या हैदराबादच्या फलंदाजांनी विस्फोटक अशी सुरुवात करून दिली. या दोघांनी पहिल्या ओव्हरला १९, दुसऱ्या ओव्हरला २१, तिसऱ्या ओव्हरमध्ये २२ धावा करत फक्त ३ षटकात संघाचे अर्धशतक पूर्ण करून दिले. दरम्यान हेडने १६ चेंडूत स्वत:च्या ५० धावा पूर्ण केल्या. त्यानंतर ही जोडी शांत झाली नाही. त्यांनी पॉवर प्ले संपण्याच्या आधीच म्हणजे ५ ओव्हरमध्ये संघाचे शतक पूर्ण केले. आयपीएलच्या इतिहासात ३० चेंडूत संघाचे शतक होण्याची ही पहिलीच वेळ ठरली. याआधीचा विक्रम चेन्नईच्या नावावर होता, त्यांनी २०१४ साली पंजाब विरुद्ध ६ षटकात १०० धावा केल्या होत्या.

हैदराबादने पॉवर प्ले मध्ये १२५ धावा केल्या. आयपीएलच्या इतिहासात पहिल्या सहा ओव्हरमध्ये झालेली ही सर्वोच्च धावसंख्या आहे. याआदीचा विक्रम केकेआरच्या नावावर होता.ज्यांनी २०१७ साली १०५ धावा केल्या होत्या. तसेच पॉवर प्लेमध्ये हेडने ८४ धावा केल्या. आयपीएलच्या इतिहासातील ही दुसऱ्या क्रमांकाची सर्वोच्च धावसंख्या ठरली. अव्वल स्थानी सुरेश रैना असून त्याने पॉवर प्लेमध्ये ८७ धावा केल्या होत्या.

शर्मा आणि हेड ज्यापद्धतीने फलंदाजी करत होते ते पाहता हैदरादबाचा प्रोजेक्टेड स्कोअर ३४८ इतका दाखवला जात होता. दिल्लीच्या गोलंदाजांना हे दोन्ही फलंदाज थोडी देखील दया दाखवत नव्हते. अशाच आज आयपीएल नव्हे तर टी-२० क्रिकेटच्या इतिहासातील सर्वोच्च धावसंख्या रचली जाणार असे वाटत असताना दिल्लीच्या मदतीला आला कुलदीप यादव होय.

चायनामन कुलदीपने सातव्या ओव्हरच्या दुसऱ्या चेंडूवर शर्माला बाद केले. त्याने फक्त १२ चेंडूत ३८३च्या स्ट्राइक रेटने ६ षटकार आणि २ चौकारांसह ४६ धावा केल्या. शर्माच्या जागी एडम मार्कराम मैदानावर आला. हा धोकादायक फलंदाज कुलदीपने त्याच षटकातील सहाव्या चेंडूवर माघारी पाठवला. यामुळे दिल्ली संघाला थोडा दिलासा मिळाला खरा पण हेड नावाचे वादळ थांबण्याची चिन्हे दिसत नव्हती. हैदराबादने ८.४ षटकात १५०चा टप्पा पार केला. कुलदीपने ९व्या षटकाच्या अखेरच्या चेंडूवर हेडला माघारी पाठवले. त्याने ३२ चेंडूत ८९ धावा केल्या.

हेड बाद झाल्यानंतर मात्र हैदराबादच्या धावांना थोडाचा लगाम बसला. अक्षर पटेलने क्लासेनला १५ धावांवर बाद करत चौथा धक्का दिला. तर कुलदीपने नितीश रेड्डीला ३७ धावांवर बाद करत चौथी विकेट मिळवली. कुलदीप यादवने घेतलेल्या पहिल्या ३ विकेटमुळे दिल्ली संघाची लाज वाचली. कारण ज्या पद्धतीने शर्मा-हेड जोडी खेळत होती ते पाहता आज ३०० धावा होती असे सर्वांना वाटत होते.

अखेरच्या काही षटकात शाहबाज अहमदने तुफानी फलंदाजी केली आणि संघाला आयपीएलच्या इतिहासातील चौथ्या क्रमांकाची विक्रमी धावसंख्या उभी करून दिली. अहमदने २९ चेंडूत नाबाद ५९ धावा केल्या.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-20T16:42:42Z dg43tfdfdgfd