INDIA T20 WORLD CUP SQUAD: टी-२० वर्ल्डकपसाठी भारतीय संघाची घोषणा या तारखेला होणार; असा असेल संभाव्य संघ

नवी दिल्ली: भारतात आयपीएलचा १७वा हंगाम सुरू आहे आणि त्यानंतर एका आठवड्यात टी-२० वर्ल्डकप होणार आहे. आयसीसीने दिलेल्या वेळेनुसार १ मे पर्यंत सर्व देशांना वर्ल्डकपसाठीचा संघ जाहीर करावा लागणार आहे. भारतीय संघाची घोषणा येत्या काही दिवसात होऊ शकते. राष्ट्रीय निवड समितीची दिल्लीत लवकरच बैठक होणार आहे. या बैठकीत १५ जणांची निवड होऊ शकते. आयसीसी टी-२० वर्ल्डकप २ जूनपासून अमेरिका आणि वेस्टइंडिजमध्ये सुरू होणार आहे.

अजित आगरकर यांच्या नेतृत्वाखाली निवड समितीची बैठक २७ किंवा २८ एप्रिल रोजी दिल्लीत होणार आहे. याच दिवशी मुंबई इंडियन्सची लढत दिल्लीत दिल्ली कॅपिटल्सविरुद्ध असून या मॅचसाठी रोहित शर्मा देखील दिल्लीत असेल. सध्या निवड समितीचे अध्यक्ष अजित आगरकर विदेशात आहेत. ते थेट दिल्लीत येतील आणि बैठक घेतील. दिल्लीत २७ किंवा २८ तारखेला भारतीय संघाची निवड केली जाऊ शकते.

एका रिपोर्टनुसार भारतीय संघात अनुभवी खेळाडूंना संधी दिली जाऊ शकते. रोहित शर्मा, विराट कोहली, सूर्यकुमार यादव, जसप्रीत बुमराह, रविंद्र जडेजा, ऋषभ पंत, अर्शदीप सिंह, मोहम्मद सिराज आणि कुलदीप यादव यांची निवड जवळ जवळ निश्चित आहे. हे खेळाडू फिट असतील तर ते वर्ल्डकप खेळतील असे म्हटले जात आहे.

वर्ल्डकपमध्ये भारताची पहिली मॅच आयर्लंडविरुद्ध ५ जून रोजी होणार आहे. तर पाकिस्तानविरुद्ध ९ जून रोजी मॅच होईल. आयपीएल २०२४ मध्ये चांगली कामगिरी करणाऱ्या खेळाडूंना टी-२० संघात स्थान मिळू शकते. या हंगामात रियान परागने फलंदाजीत दमदार कामगिरी केली आहे.

टी-२० वर्ल्डकपसाठी भारताचा संभाव्य संघ

रोहित शर्मा (कर्णधार), केएल राहुल, विराट कोहली, सूर्यकुमार यादव, शुभमन गिल, रिंकू सिंह, कुलदीप यादव, रवी बिश्नोई, ऋषभ पंत, इशान किशन, जसप्रीत बुमराह, मोहम्मद सिराज, अर्शदीप सिंह, हार्दिक पंड्या, अक्षर पटेल

भारताच्या लढती

०५ जून विरुद्ध आयर्लंड

०९ जून विरुद्ध पाकिस्तान

१२ जून विरुद्ध अमेरिका

१५ जून विरुद्ध कॅनडा

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-20T09:56:58Z dg43tfdfdgfd