IPL मधील सर्वात महागडा खेळाडू संघाबाहेर, केकेआरला सामन्यापूर्वीच बसला मोठा धक्का

कोलकाता : केकेआरच्या संघाला पंजाब किंग्सविरुद्धचा सामना सुरु होण्यापूर्वीच मोठा धक्का बसला आहे. या आयपीलमध्ये सर्वात महागडा खेळाडू केकेआरने आपल्या संघात घेतला होता. पण आता हाच सर्वात महागडा खेळाडू संघाबाहेर गेला आहे.

केकेआरने या आयपीएलच्या लिलावात तब्बल २४.७५ कोटी रुपये खर्च करत ऑस्ट्रेलियाच्या मिचेल स्टार्कला संघात स्थान दिले होते. पण आता तोच पंजाबविरुद्धच्या सामन्यात खेळणार नसल्याचे समोर आले आहे. कारण स्टार्कच्या बोटांना दुखापत झाली आहे आणि त्यामुळेच त्याला संघाबाहेर ठेवण्यात आले आहे, अशी माहिती केकेआरचा कर्णधार श्रेयस अय्यरने दिला आहे.

आयपीएल गुणतक्त्यात दुसऱ्या क्रमांकावर असूनही कोलकाता नाइट रायडर्स संघाला गोलंदाजांचा प्रश्न सतावत आहे. कोलकात्याची आज, पंजाब किंग्जविरुद्ध आयपीएल टी-२० क्रिकेट स्पर्धेत लढत होईल. या लढतीपासून मिचेल स्टार (२४.७८ कोटी रुपये) आपल्या मोठ्या किंमतीस न्याय देईल, अशी अपेक्षा कोलकाता संघव्यवस्थापन बाळगून आहे.

फलंदाजांच्या प्रभावी कामगिरीमुळे कोलकात्याची यशस्वी वाटचाल सुरु आहे. सुनील नारायण (स्ट्राईक रेट १७६.५४), फिल सॉल्ट (१६९.३८) यांच्याकडून आक्रमक सुरुवात. आंद्रे रसेल, श्रेयस अय्यरकडूनही चांगली कामगिरी होत आहे. रिंकू सिंहची फटकेबाजीही फायदेशीर ठरत आहे. श्रेयस अय्यर सोडल्यास अन्य आघाडीच्या फलंदाजांचा स्ट्राईक रेट किमान दीडशे तरी नक्कीच आहे. नितिश राणा तसेच वेंकटेश अय्यरच्या दुखापतीमुळे संघाची ताकद काहीशी कमी झाल्याचे म्हटले जात आहे.

गोलंदाजीमध्ये केकेआरची कामगिरी फारशी समाधानकारक नाही. सुनील नारायण (इकॉनॉमी रेट ७.१०) सोडल्यास अन्य गोलंदाजांना निराशा केली आहे. मिचेल स्टार्क साफ अपयशी. मात्र, हर्षित राणा, वैभव अरोराची समाधानकारक कामगिरी झाली आहे.

पंजाब किंग्सला शशांक सिंग आणि आशुतोष शर्मासारखे चांगले खेळाडू गवसले; पण तरीही कामगिरीत सातत्याचा अभाव जाणवत आहे. मोक्याच्या वेळी खेळ उंचावण्यात पंजाबचा संघ कायम अपयशी ठरत आहे. सुनील नारायणला रजत पाटीदारने एका षटकात दोन षटकार मारले होते, हे शशांक आणि आशुतोषला प्रेरणा देईल. सुरुवातीचे फलंदाज धावा करण्यात अपयशी ठरत आहेत.

कोलकाता वि. पंजाब

ठिकाण ः इडन गार्डन, कोलकाता

प्रक्षेपण ः संध्याकाळी ७.३० पासून स्टार स्पोर्ट्स, जिओ सिनेमा

यंदाच्या स्पर्धेत ः कोलकात्याचा सातपैकी पाच सामन्यांत विजय, गुणतक्त्यात दुसरे. निव्वळ धावगती १.२०६. पंजाबचा आठपैकी दोनच सामन्यांत विजय. गुणतक्त्यात नववे. निव्वळ धावगती -०.२९२.

गेल्या पाच सामन्यांत ः कोलकात्याचे तीन विजय आणि दोन पराभव, तर पंजाबचे चार पराभव आणि एक विजय.

एकमेकांविरुद्ध ः प्रतिस्पर्ध्यातील ३२ सामन्यांत कोलकात्याचे २१-११ असे वर्चस्व. गेल्या पाच सामन्यांत कोलकात्याचे तीन विजय, तर पंजाबचे दोन. यापूर्वीच्या लढतीत कोलकात्याची सरशी

हवामानाचा अंदाज ः लढतीच्या वेळी २९ अंश तापमान. अपेक्षित आर्द्रता ७२ टक्के.

खेळपट्टीचा अंदाज ः चेंडू चांगल्या प्रकारे बॅटवर येत असल्याचा फलंदाजांस फायदा. दवाचा परिणाम होणार असल्यामुळे धावसंख्येच्या पाठलागास पसंती अपेक्षित

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-26T14:12:48Z dg43tfdfdgfd