IPL सुरू होण्याच्या ४८ तास आधी या संघाला बसला झटका; खेळाडू म्हणाला, माझ्यासाठी थोडी आणखी वाट पाहा

कोलंबो: आयपीएलचा १७वा हंगाम सुरू होण्यासाठी फक्त २ दिवसांचा कालावधी शिल्लक आहे. अशात सनरायझर्स हैदराबाद संघाला मोठा झटका बसला आहे. श्रीलंकेचा ऑलराउंडर वानिंदु हसरंगा यांची २२ मार्चपासून बांगलादेशविरुद्ध होणाऱ्या दोन कसोटी सामन्यांच्या मालिकेसाठी निवड करण्यात आली आहे. यामुळे हसरंगा आयपीएल २०२४ मधील पहिल्या २ ते ३ सामने खेळू शकणार नाही.

लंकेकडून फक्त ४ कसोटी खेळणाऱ्या हसरंगाने कसोटी क्रिकेटमधून निवृत्ती घेतली होती. त्यानंतर निवृत्ती मागे घेत तो पुन्हा कसोटी क्रिकेटमध्ये परत आला आहे. श्रीलंका आणि बांगलादेश यांच्यातील पहिली कसोटी २२ ते २६ मार्च दरम्यान तर दुसरी कसोटी ३० मार्च ते ३ एप्रिल या काळात होणार आहे.

सनरायझर्स हैदराबादने हसरंगाला १.५ कोटींना संघात घेतले होते. आयपीएलच्या पहिल्या दोन आठवड्यांचा कार्यक्रम जाहीर झाला असून हैदराबादची पहिली मॅच २३ मार्च रोजी कोलकाता नाईट रायडर्सविरुद्ध तर २७ मार्चला मुंबई इंडियन्सविरुद्ध लढत होणार आहे. ३१ मार्चला ते गुजरात टायटन्सविरुद्ध मैदानात उतरतील. अशाच पहिल्या ३ लढतीसाठी हसरंगा उपलब्ध असेल याबाबत शंका वाटते.

हैदराबादची ५ एप्रिल रोजी चेन्नई सुपर किंग्जविरुद्ध लढत होणार आहे. यासाठी हसरंगा उपलब्ध असेल अशी अशा आहे. भारतीय खेळपट्टी कशी आहे हे हसरंगाला चांगली कल्पना आहे. त्यामुळेच विजय मिळून देण्यात त्याची भूमिका महत्त्वाची ठरू शकते. मात्र पहिल्या ३-४ लढतींसाठी तो उपलब्ध नसल्याने हैदराबादच्या अडचणी वाढू शकतील.

लंकेच्या कसोटी संघात त्याचा समावेश केल्याने हैदराबाद संघाला आपली फसवणू्क झाल्यासारखे वाटू शकते. हैदराबादने २०१६ साली आयपीएलचे विजेतेपद मिळवले होते. पण त्यानंतर गेल्या काही वर्षात हंगाम त्यांच्यासाठी एखाद्या वाईट स्वप्नासारखे गेले आहेत.

आयपीएलच्या पहिल्या टप्प्यातील SRHच्या लढती २३ मार्च- कोलकाता विरुद्ध हैदराबाद- रात्री ७.३० वाजता, कोलकाता.

२७ मार्च- हैदराबाद विरुद्ध मुंबई- रात्री ७.३० वाजता, हैदराबाद

३१ मार्च- गुजरात विरुद्ध हैदराबाद- दुपारी ३.३० वाजता, अहमदाबाद.

०५ एप्रिल- हैदराबाद विरुद्ध चेन्नई- रात्री ७.३० वाजता, हैदराबाद.

2024-03-19T13:58:14Z dg43tfdfdgfd