मुंबई: वेस्ट इंडिजविरुद्ध इंग्लंड कसोटी सामना आज म्हणजे १० जुलै २०२४ रोजी लॉर्ड्स मैदानावर ३.३० वाजता रंगणार आहे. वेस्ट इंडिजविरुद्धच्या दोन सामन्यांच्या मालिकेतील पहिल्या सामन्यात इंग्लंडचा महान वेगवान गोलंदाज जेम्स अँडरसन मैदानात उतरेल तेव्हा तो आपल्या कसोटी कारकिर्दीतील शेवटच्या सामन्यात संस्मरणीय कामगिरी करण्याचा प्रयत्न करेल. ऐतिहासिक लॉर्ड्स मैदानावर खेळला जाणारा मालिकेतील पहिला सामना अँडरसनचा त्याच्या कारकिर्दीतील १८८वा आणि शेवटचा कसोटी सामना असेल.
इसीबीचे व्यवस्थापकीय संचालक रॉब की, प्रशिक्षक बँडन मॅक्क्युलम आणि कर्णधार बेन स्टोक्स यांनी २०२५-२६ मध्ये खेळल्या जाणाऱ्या ऍशेसमध्ये अँडरसन खेळणार नसल्याचे जाहीर केले आणि त्यानंतर अँडरसनने या वर्षी एप्रिलमध्ये निवृत्त होण्याचा निर्णय घेतला होता. अशा परिस्थितीत सचिन तेंडुलकरप्रमाणेच निवृत्त होण्याला निर्णय घेतला. सचिनही वेस्ट इंडिजविरुद्धच आपला शेवटचा सामना खेळले होते आणि आता अँडरसनही आपला शेवटचा सामना इंडिजविरुद्धच खेळणार आहे.
अँडरसनने भारतात खेळलेल्या शेवटच्या मालिकेत ३३.५० च्या सरासरीने १० विकेट घेतल्या होत्या. वेस्ट इंडिजविरुद्धच्या मालिकेपूर्वी धर्मशाला येथे ७०० बळींचा टप्पा गाठणारा तो पहिला वेगवान गोलंदाज ठरला, अँडरसनने काऊंटी क्रिकेटमध्ये लंकेशायरसाठी ३५ धावांत सात विकेट्स घेत पुन्हा कमबॅक केला. अँडरसनने २१ वर्षांपूर्वी २००३ मध्ये लॉर्ड्सच्या मैदानावरच कारकिर्दीला सुरुवात केली होती.
वेगवान गोलंदाज गस ऍटकिन्सन आणि यष्टिरक्षक जेमी स्मिथ यांना कसोटी पदार्पणाची संधी देण्यात आली आहे. या दोघांनी गेल्या वर्षी इंग्लंडकडून मर्यादित षटकांच्या फॉरमॅटमध्ये क्रिकेट खेळले होते. ॲटकिन्सन हा एकदिवसीय वर्ल्ड कप संघाचा भाग होता. ख्रिस वोक्स संघात पुनरागमन करत असून मागील वर्षी ॲशेसमध्ये तो मालिकेतील सर्वोत्तम खेळाडू ठरला. स्टोक्स एका अष्टपैलू खेळाडूच्या भूमिकेत दिसणार आहे, जो भारत दौऱ्यावर १७ बळी घेणारा ऑफस्पिनर शोएब बशीरला घरच्या कसोटीत प्रथमच मैदानात उतरण्याची संधी देईल.
या वर्षी जानेवारीमध्ये ब्रिस्बेनमध्ये ऑस्ट्रेलियावर आठ धावांनी रोमहर्षक विजय मिळवल्यानंतर वेस्ट इंडिजचा संघ पहिली कसोटी खेळणार आहे. माजी कर्णधार आणि अष्टपैलू जेसन होल्डरसह वेगवान गोलंदाज जेडेन सील्सचे संघात पुनरागमन झाले आहे. सलामीवीर मिकेल लुईस आणि वेगवान गोलंदाज जेरेमिया लुईस हे १५ सदस्यीय संघात नवीन खेळाडू आहेत. दुखापतग्रस्त केमार रोचच्या जागी लुईसचा संघात समावेश करण्यात आला आहे.
अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या. 2024-07-10T07:55:16Z dg43tfdfdgfd