TRAVIS HEAD IPL CENTURY:ट्रेव्हिस हेडचे शतक म्हणजे अपमानाचा बदला; RCBने पाहा त्याच्यासोबत काय केले होते
बेंगळुरू: आयपीएल २०२४च्या हंगामात आतापर्यंत ४ शतकं झाली आहेत. पहिले शतक विराट कोहली, दुसरे जोस बटलर, तिसरे रोहित शर्मा आणि चौथे ऑस्ट्रेलियाचा ब्लॉकस्टार फलंदाज ट्रेव्हिस हेड याने होय. हेडचे आरसीबी विरुद्धचे शतक म्हणजे त्याचा आयपीएल लिलावात झालेल्या अपमानाचा बदला म्हटले जात आहे. जाणून घ्या असे म्हणण्याचे कारण तरी काय?
रॉयल चॅलेंजर्स बेंगळुरूविरुद्धच्या लढतीत हेडने या हंगामातील सर्वात वेगवान शतक झळकावले. तर स्पर्धेच्या इतिहासातील चौथ्या क्रमांकाचे वेगवान शतक ठरले. आयपीएलच्या १७व्या हंगामात हेड धोकादायक फलंदाज ठरला आहे. विशेष म्हणजे २०२३च्या आयपीएल हंगामातील लिलावाता त्याला कोणी खरेदी देखील केले नव्हते. २०२३च्या लिलावात हेडने २ कोटी या बेस प्राइससह नाव नोंदवले होते. पण त्याला कोणीही संघात घेण्यास उत्सुक नव्हते. याचे महत्त्वाचे कारण म्हणजे २०१६ आणि २०१७ मधील त्याचा आरसीबीसोबतची कामगिरी होय. २०२६ साली बेंगळुरूकडून खेळणाऱ्या हेडने ३ सामन्यात फक्त ३७ धावा केल्या होत्या. तर २०१७च्या हंगामात ७ सामन्यात त्याला १५१ धावा करता आल्या.
आता मात्र हेडने त्याच्या आधीच्या संघाविरुद्ध अशी कामगिरी केली ज्याचा कोणी विचार देखील केला नव्हता. त्याने २०२३ वर्ल्डकपमध्ये न्यूझीलंडविरुद्ध शतकी खेळी केली होती. त्यानंतर अंतिम सामन्यात भारताविरुद्ध १३७ धावांची खेळी करून देशाला ८वे वर्ल्डकप विजेतेपद मिळून दिले होते.
ज्या संघाने त्याला बाहेर केले आणि अन्य कोणीही लिलावात भाव दिला नाही त्या हेडचे नशीब २०२४च्या लिलावात बदलले. हैदराबादने लिलावात त्याला ६.८ कोटींना खरेदी केले. बेंगळुरू विरुद्ध ३९ चेंडूत १०० धावा करणाऱ्या हेडने मुंबई विरुद्ध ६२ धावांची वेगवान खेळी केली होती. तेव्हा हैदराबादने २७७ धावांचा विक्रमी डोंगर उभा केला होता. या विक्रमी धावसंख्येचा रेकॉर्ड हैदराबादने काही दिवसात मागे टाकला.
टी-२० क्रिकेटच्या इतिहासात हैदराबादने उभी केलेली २८७ धावांची धावसंख्या ही दुसऱ्या क्रमांकाची ठरली आहे. अव्वल स्थानी नेपाळचा संघ असून त्यांनी मंगोलियाविरुद्ध ३१४ धावा केल्या आहेत.
अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या. 2024-04-16T15:37:49Z dg43tfdfdgfd