मुंबई : खुशी निजाई (नाबाद ६०) आणि लेग स्पिनर श्रेया सुरेश (१८ धावात ४ बळी) या दुक्कलीच्या शानदार प्रदर्शनामुळे डॅशिंग स्पोर्ट्स क्लबने एमआयजी क्रिकेट क्लबचा ४८ धावांनी सहज पराभव करून चौथ्या अजित घोष ट्रॉफी महिला टी२० क्रिकेट स्पर्धेचे अजिंक्यपद पटकावण्यात यश आले.
मुंबई क्रिकेट असोसिएशनच्या या अधिकृत स्पर्धेमध्ये आठ संघांचा सहभाग होता. स्पोर्टिंग युनियन, कल्याणदास मेमोरियल स्पोर्ट्स फाऊंडेशन आणि युरोपेम यांनी या स्पर्धेचे आयोजन केले होते. डॅशिंगने नाणेफेक जिंकून फलंदाजी पत्करली, पण काही वेळातच उण्यापुऱ्या २० धावांवर त्यांनी तीन विकेट गमावल्या. त्यानंतर खुशीच्या खेळीमुळे त्यांना ५ बाद १३६ धावांचा पल्ला गाठता आला. खुशीने बचाव आणि आक्रमण यांचा मिलाफ साधत ४५ चेंडूत ६० धावा काढल्या. त्यात तिने ८ चौकार मारले. तिने ईशिका जगताप (२२) हिच्यासह चौथ्या विकेटसाठी ६२ चेंडूत ८० धावांची भागीदारी केली.
प्रथम दर्शनी काहीशी कमी वाटणारी डॅशिंगची धावसंख्या मग फारच मोठी भासू लागली. कारण एमआयजीचा डाव सुरुवातीपासूनच अडखळला. त्यांनी झटपट विकेट्स गमावल्या आणि त्यामुळे धावगती पण मंदावली. डॅशिंगच्या श्रेया सुरेशने १३व्या षटकात एकही धाव न देता ३ विकेट्स घेत एमआयजीची ७ बाद ६१ अशी अवस्था करताच विजेते पदाचा निकाल लागून गेला. स्पर्धेचा बक्षिस समारंभ आंतरराष्ट्रीय खेळाडू पुनम राऊत, युरोपेमचे कंट्रीहेड बी. सी. पटेल आणि एमसीएचे अभय हडप यांच्या हस्ते संपन्न झाला.
संक्षिप्त धावफलकडॅशिंग स्पोर्ट्स क्लब २० षटकांमध्ये ५ बाद १३६ (खुशी निजाई नाबाद ६०, ईशिका जगताप २२, हर्षी पुरस्नानी १७/३, ख्याती स्वेन २०/२) विजयी विरुद्ध एमआयजी क्रिकेट क्लब १९.५ षटकात सर्वबाद ८८ (हिर कोठारी १९, श्रेया सुरेश १८/४) सामन्यात सर्वोत्तम श्रेया सुरेश
स्पर्धेत सर्वोत्तम - महेक मिस्त्री (एमआयजी), सर्वोत्तम फलंदाज - रिया पवार (युरोपेम), सर्वोत्तम गोलंदाज - त्रिशा नायर (डॅशिंग), स्पर्धेतील उदयोन्मुख खेळाडू - किंजल कुमारी (साईनाथ)
2024-03-07T12:41:29Z dg43tfdfdgfd