अश्विन शेळकेचे सहा धावांत ६ विकेट्स, युनायडेट संघाचा दणदणीत विजय

ठाणे : अश्विन शेळकेच्या भेदक गोलंदाजीच्या जोरावर युनायटेड पटनी इन्टरप्रायझेसने अभ्युदय बँकेचा आठ विकेट्सनी दणदणीत पराभव करत ४८ व्या ठाणेवैभव आंतरकार्यालयीन वासंतिक क्रिकेट स्पर्धेतील आपली वाटचाल कायम राखली. अश्विनने अवघ्या सहा धावांच्या मोबदल्यात सहा विकेट्स मिळवत अभ्युदय बँकेला अवघ्या ६३ धावांवर रोखले. युनायटेड पटनी इन्टरप्रायझेसने दोन फलंदाजांच्या मोबदल्यात ६६ धावा करत विजय मिळवला.

याआधीच्या सामन्यांमध्ये चांगली कामगिरी करणारे अभ्युदय बँकेचे फलंदाज यावेळी मात्र सपशेल अपयशी ठरले. त्यांच्या राजेश विचारेचा अपवाद वगळता इतर फलंदाज झटपट बाद झाले. त्यात पाच जणांना धावांचे खातेही खोलता आले नाही. राजेशची २८ धावांची खेळी आणि अवांतर ११ धावांमुळे अभ्युदय बँकेला ६३ धावांपर्यंत मजल मारता आली. अश्विनने ३.१ षटकात एका निर्धाव षटकासह विकेट्सचा षटकार ठोकला. अश्विनने यावेळी अचूक आणि भेदक मारा केला. त्याने आपल्या फिरकीच्या जोरावर फलंदाजांना चांगलेच नाचवल्याचे पाहायला मिळाले. अश्विनच्या या दमदार कामगिरीच्या जोरावर संघाला विजय मिळवणे सोपे झाले. धनराज गुरय आणि ओंकार पटनीने प्रत्येकी दोन फलंदाज बाद करत अश्विनला चांगली साथ दिली. त्यामुळे युनायटेडच्या संघाला अभ्युदय बँकेला ६३ धावांत ऑल आऊट करता आले.

छोट्या आव्हानाचा पाठलाग करताना युनायटेड पटनी इन्टरप्रायझेस संघाची सुरुवात खराब झाली. पण सलामीला आलेल्या दिशांत कोटियनने दोन महत्वपूर्ण भागीदाऱ्या रचत संघाला पुढच्या फेरीत स्थान मिळवून दिले. दिशांतने २८ धावांचे योगदान देताना पहिल्या विकेटसाठी २० आणि तिसऱ्या विकेटसाठी ३४ धावांची भागीदारी केली. अक्षय लांजेकरने नाबाद २१ धावा केल्या. संजोग पाटील या डावात दोन विकेट्स मिळवल्या.

संक्षिप्त धावफलक : अभ्युदय बँक : १६.१ षटकात सर्वबाद ६३ ( राजेश विचारे २८, अश्विन शेळके ३.१-१-६-६, धनराज गुरय ५-२५-२, ओमकार पटनी ५-२-१५-२) पराभूत विरुद्ध युनायटेड पटनी इन्टरप्रायझेस : १०.२ षटकात २बाद ६६ ( दिशांत कोटियन २८, अक्षय लांजेकर नाबाद २१, संजोग पाटील ५-२२-२).

2024-03-13T14:27:44Z dg43tfdfdgfd