असे फक्त राहुल द्रविडच करू शकतात; साधेपणाने पुन्हा एकदा मन जिंकले, मतदान हक्क बजावताना पाहा काय घडले

बेंगळुरू: लोकसभा निवडणुकीच्या दुसऱ्या टप्प्याचे मतदान आज २६ एप्रिल रोजी सुरू आहे. या टप्प्यात कर्नाटकातील १४ मतदारसंघांचा समावेश आहे. भारताचा दिग्गज क्रिकेटपटू आणि सध्या टीम इंडियाचा मुख्य प्रशिक्षक राहुल द्रविड यांनी आज बेंगळुरूच्या डॉलर्स कॉलनी येथे मतदान केले. राहुल नेहमीच त्याच्या शांत आणि साध्या स्वभावासाठी ओळखला जातो.

आज मतदानासाठी आल्यावर देखील द्रविडचा हा साधेपणा सर्वांना भावला. द्रविड यांनी कोणतेही स्टारडम न दाखवता मतदान केले. ते नेहमीच्या साध्या कपड्यात आले होते. मतदानासाठी रांगेत उभे राहिलेला त्यांचा व्हिडिओ सोशल मीडियावर व्हायरल होत आहे. द्रविड यांचा हा फोटो सोशल मीडियावर चर्चेत आला आहे. एका युझरने- व्होटिंग लाइनमध्ये द वॉल अशी कमेंट दिली आहे.

निळा टी-शर्ट आणि शॉर्ट्स घालून द्रविड मतदानासाठी आले होते. त्यांच्या या व्हिडिओवर अनेक चाहते प्रतिक्रिया देत आहेत.

मतदान केल्यानंतर काय म्हणाले द्रविड-

मतदान प्रक्रिया फार सहज आणि सोपी होती. लोकशाही पुढे नेण्यासाठी हे फार महत्त्वाचे आहे. मी सर्वांना आवाहन करतो की त्यांनी घरातून बाहेर पडावे आणि मतदानाचा हक्क पार पाडावा. मला आशा आहे की, बेंगळुरूमध्ये यावेळी मोठ्या प्रमाणात मतदान होईल. अनेकजण प्रथमच मतदान करणार आहेत. सर्वांनी मतदान करावे. युवक आणि युवतींनी यासाठी पुढाकार घ्यावा, असे द्रविड म्हणाले.

द्रविड यांच्यासाठी पुढील काही महिने फार महत्त्वाचे असणार आहेत. जून महिन्यात टी-२० वर्ल्डकप होणार आहे. यासाठी या महिन्याच्या अखेरीस संघाची निवड करायची आहे. भारताने २००७ साली पहिल्या टी-२० वर्ल्डकपचे विजेतेपद मिळवले होते. तेव्हापासून भारताला विजेतेपदाची प्रतिक्षा आहे. यावर्षी टीम इंडियाने वर्ल्डकप जिंकावा अशी सर्व भारतीय चाहत्यांची इच्छा असेल. काही महिन्यांपूर्वी झालेल्या वनडे वर्ल्डकपमध्ये भारताने अंतिम फेरीत धडक मारली होती. पण अंतिम सामन्यात ऑस्ट्रेलियाकडून पराभव स्विकारावा लागला होता. आता द्रविड यांच्या मार्गदर्शनाखाली भारत टी-२० वर्ल्डकप जिंकतो का याची उत्सुकता असेल.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-26T12:12:28Z dg43tfdfdgfd