आयपीएलमध्ये वर्ल्ड रेकॉर्ड... कोणत्या सामन्यात सर्वाधिक षटकार खेचले गेले जाणून घ्या...

दिगंबर शिंगोटे : यंदाच्या आयपीएलमध्ये एकामागून एक उच्चांक प्रस्थापित होत आहेत, आता आणखी एका विक्रमाची भर पडली आहे. एकाच सामन्यात सर्वाधिक षटकारांचा विक्रम आता या आयपीएलमध्ये झाला आहे. टी-२० क्रिकेटमध्ये एवढे षटकार पहिल्यांदाच पाहायला मिळाले आहे.

बेंगळुरूला १५ एप्रिलला सनरायझर्स हैदराबाद संघाने रॉयल चॅलेंजर्स बेंगलुरूविरुद्ध ३ बाद २८७ धावा केल्या होत्या. ही आयपीएलमधील एका सामन्यात संघाने नोंदवलेली सर्वोच्च धावसंख्या ठरली. तसेच, टी-२० क्रिकेटमधील ही दुसऱ्या क्रमांकाची धावसंख्या ठरली. गेल्या वर्षी नेपाळने मंगोलियाविरुद्ध ३ बाद ३१४ धावांचा विश्वविक्रम रचला होता. आता टी-२० क्रिकेटमध्ये प्रथमच एका सामन्यात चाळीसहून अधिक षटकार लगावले गेले आहेत. कोलकाता नाइट रायडर्स आणि पंजाब किंग्ज या संघांतील सामन्यात ४२ षटकारांचा विक्रम नोंदला गेला आहे. त्यामुळे हा वर्ल्ड रेकॉर्ड आता आयपीएलमध्ये झाला आहे. यात सर्वाधिक षटकार शतकवीर जॉनी बेअरस्टोने नोंदवले आहे. त्याने आपल्या नाबाद १०८ धावांच्या खेळीत नऊ षटकारांची बरसात केली. त्यापाठोपाठ शशांकसिंहने या सामन्यात सर्वाधिक षटकार लगावले. त्याने आपल्या नाबाद ६८ धावांच्या खेळीत आठ षटकार लगावले.

टी-२० क्रिकेटमध्ये यापूर्वी सनरायझर्स हैदराबाद आणि मुंबई इंडियन्स या संघांत झालेल्या सामन्यात ३८ षटकार लगावले गेले होते. त्याप्रमाणेच सनरायझर्स हैदराबाद-रॉयल चॅलेंजर्स बेंगळुरू या संघांतील सामन्यादरम्यानही ३८ षटकार लगावले गेले होते. आता एका सामन्यात सर्वाधिक षटकारांच्या बाबतीत पंजाब किंग्ज-कोलकाता नाइट रायडर्स यांच्यातील सामना आता अव्वल स्थानावर आहे. या सामन्यात ३७ चौकारही लगावले गेले. पंजाब-कोलकाता सामन्यात २५२ धावा षटकारांतून, तर १४८ धावा चौकारांतून झाल्या.

पंजाब किंग्ज संघाने आणखी एक विक्रम रचला. आयपीएलमध्ये एका डावात सर्वाधिक षटकार लगावण्याचा विक्रम पंजाब किंग्ज संघाच्या नावावर झाला आहे. पंजाब किंग्ज संघाकडून कोलकाता संघाविरुद्ध एकूण २४ षटकार नोंदले गेले. याबाबतीत पंजाब किंग्ज संघाने सनरायझर्स हैदराबाद संघाला मागे टाकले. सनरायझर्स हैदराबाद संघाकडून रॉयल चॅलेंजर्स बेंगळुरूविरुद्धच्या सामन्यात २२ षटकारांची नोंद झाली होती; तसेच हैदराबादकडून दिल्ली कॅपिटल्सविरुद्धही २२ षटकारांची नोंद झाली होती.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-28T16:36:12Z dg43tfdfdgfd