ऋतुजा भोसलेने आयटीएफ टेनिस स्पर्धेत ​पटकावले २३वे विजेतेपद

दिगंबर शिंगोटे : महाराष्ट्राच्या ऋतुजा भोसलेने न्यूझीलंडच्या पेज हूरीगनच्या साथीने महिलांच्या आयटीएफ टेनिस स्पर्धेतील दुहेरीचे विजेतेपद पटकावले. अंतिम लढतीत मॅच पॉइंट वाचवून ऋतुजा-पेज यांनी आयसूआन चो-यि त्सेन चो या तैवानच्या जोडीवर ५-७, ७-६ (५), १२-१० अशी मात केली. पुण्याच्या ऋतुजाचे हे आयपीएफ स्पर्धेतील दुहेरीचे या वर्षीचे पहिले आणि एकूण २३वे विजेतेपद ठरले.

वूनिंगमध्ये (चीन) ही स्पर्धा झाली. पहिल्या सेटमध्ये सुरुवातीला ऋतुजा-पेज यांनी ४०-१५ अशा आघाडीसह ब्रेक पॉइंट मिळवले होते. मात्र, ही संधी त्यांना साधता आली नाही. त्यानंतर, सातव्या गेममध्येही ऋतुजा-पेज यांनी ४०-३० अशा आघाडीसह ब्रेक पॉइंट मिळवला होता. मात्र, या वेळीही त्यांना संधी साधता आली नाही. आपापल्या सर्व्हिस राखल्यामुळे दहाव्या गेमअखेर ५-५ अशी बरोबरी कायम होती. मात्र, त्यानंतर आयसूआन-यि त्सेन यांनी सलग दोन गेम जिंकून पहिल्या सेटमध्ये बाजी मारली.

आव्हान राखण्यासाठी ऋतुजा-पेज यांना दुसरा सेट जिंकणे गरजेचे होते. मात्र, आयसूआन चो-यि त्सेन यांनी जोरदार सुरुवात केली. त्यांनी पाहता पाहता ५-२ अशी आघाडी घेतली होती. आठव्या गेममध्ये त्यांनी ४०-३० अशा आघाडीसह मॅच पॉइंट मिळवला होता. मात्र, ऋतुजा-पेज यांनी झुंज देऊन तो वाचवला आणि गेमही जिंकली. तोच धडाका कायम ठेवून ऋतुजा-पेज यांनी ६-५ अशी आघाडी घेतली. बाराव्या गेममध्ये ऋतुजा-पेज यांनी ४०-३० अशा आघाडीसह सेट पॉइंट मिळवला होता. मात्र, ही संधी त्यांना साधता आली नाही. या गेममध्ये आयसूआन चो-यि त्सेन यांनी बाजी मारली आणि सेट टायब्रेकरमध्ये गेला. त्यातही काँटे की टक्कर पाहायला मिळाली. मात्र, मोक्याच्या क्षणी पॉइंट घेऊन ऋतुजा-पेज यांनी पॉइंट घेऊन सेटमध्ये बाजी मारली.

‘सुपर टायब्रेकर’मध्येही ‘काँटे की टक्कर’ पाहायला मिळाली. यामध्ये ऋतुजा-पेज यांनी ८-५ अशी आघाडी घेतली होती. त्यानंतर सलग चार पॉइंट घेऊन आयसूआन चो-यि त्सेन यांनी ९-८ अशी आघाडी घेतली होती. अर्थात, आयसूआन चो-यि त्सेन यांच्याकडे आणखी एक मॅच पॉइंट होता. मात्र, तो पॉइंट ऋतुजा-पेज यांनी वाचवला. १०-१० बरोबरीनंतर सलग दोन पॉइंट घेऊन ऋतुजा-पेज यांनी विजेतेपदावर शिक्कामोर्तब केले.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-05-06T19:37:57Z dg43tfdfdgfd