ऋतुराज पु्न्हा ठरला तारणहार, चेन्नईने पंजाबला विजयासाठी किती धावांचे आव्हान दिले पाहा...

चेन्नई : पुन्हा एकदा ऋतुराज गायकवाड चेन्नईच्या संघासाठी तारणहार ठरल्याचे पाहायला मिळाले. चेन्नईने चांगली सुरुवात केली. पण त्यानंतर एकामागून एक विकेट्स गेल्याने त्यांची अवस्था बिकट झाली होती. पण त्यावेळी ऋतुराज संघाच्या मदतीला धावून आला आणि त्याने पाच चौकार आणि दोन षटकारांच्या जोरावर ६२ धावांची खेळी साकारत संघाला सावरले. अखेरच्या षटकांमध्ये फलंदाजीला आलेल्या धोनीने चाहत्यांची मनं जिकंली. त्यामुळे चेन्नईला यावेळी पंजाबच्या संघाला १६३ धावांचे आव्हान देता आले. धोनीने यावेळी एक चौकार आणि एका षटकाराच्या जोरावर १४ धावा केल्या.

ऋतुराज गायकवाड आणि अजिंक्य रहाणे या दोघांनी या सामन्यात संघाला दमदार सुरुवात करून दिली. यापूर्वी अजिंक्य हा अपयशी ठरत होता. पण अजिंक्यने यावेळी दमदार फलंदाजी करत संघाला चांगली सुरुवात करून दिली. अजिंक्य आणि ऋतुराज या दोघांनी यावेळी ६४ धावांची दमदार सलामी दिली. अजिंक्य यावेळी बाद झाला आणि ही जोडी फुटली. अजिंक्यने यावेळी २४ चेंडूंत पाच चौकारांच्या जोरावर २९ धावांची खेळी साकारली. अजिंक्य बाद झाला आणि संघाला त्यानंतर एकामागून एक दोन मोठे धक्के बसले.

चेन्नईने शिवम दुबेला यावेळी तिसऱ्या स्थानावर बढती दिली होती. पण शिवमला या संधीचा फायदा उचलता आला नाही आणि तो शून्यावर बाद झाला. त्यानंतर फलंदाजीला आलेला रवींद्र जडेजाही फक्त दोनच धावा करून शकला. त्यानंतर चेन्नईच्या संघाने एक वेगळी चाल खेळली आणि त्यांनी अजिंक्यला संघाबाहेर करत त्याच्या बदली समीर रिझवी हा इम्पॅक्ट खेळाडू संघात घेतला आणि त्याला थेट फलंदाजीला पाचव्या स्थानावर उतरवले. समीरने यावेळी २१ धावा केल्या. त्यानंतर फलंदाजीला आलेल्या मोईन अलीने काही वेळ ऋतुराजला चांगली साथ दिली.

ऋतुराज सध्या भन्नाट फॉर्मात असल्याचे पाहायला मिळत आहे आणि याचा प्रत्यय या सामन्यातही आला. कारण सलग तिसऱ्या सामन्यात तो चेन्नईकडून सर्वाधिक धावा करणारा खेळाडू ठरला आहे. एकिकडे संघाची पडझड सुरु होती. पण ऋतुराजने मात्र संघाला सारवण्याचा चांगला प्रयत्न केला. ऋतुराजने यावेळी अर्धशतक झळकावले आणि त्यानंतर तो चांगलाच आक्रमक फलंदाजी करायला लागला. ऋतुराजने दमदार फटकेबाजी करत अखेरच्या काही षटकांमध्ये संघाची धावगती चांगलीच वाढवल्याचे पाहायला मिळाले.

या सामन्यासाठी नवीन खेळपट्टी वापरण्यात आली होती, जी संथ असल्याचे म्हटले जात होते. त्यामुळेच चेन्नईच्या संघाला या सामन्यात मोठी धावसंख्या उभाता आली नाही.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-05-01T16:18:00Z dg43tfdfdgfd