ऐतिहासिक निर्णय; पॅरिस ऑलिंपिकमध्ये नीरज चोप्राला मिळणार इतके लाख? आंतरराष्ट्रीय ऍथलेटिक्स संघाची मोठी घोषणा

पॅरिस: २०२४ हे वर्ष ऑलिंपिक स्पर्धांचे वर्ष आहे. या वर्षी पॅरिस येथे ऑलिंपिक स्पर्धा होणार आहेत. फ्रान्सची राजधानी पॅरिस येथे २६ जुलै ते ११ ऑगस्ट या काळात ही स्पर्धा होणार आहे. ऑलिंपिक स्पर्धेच्या आधी एक मोठी बातमी समोर आली आहे. ज्याचा या स्पर्धेत भाग घेणाऱ्या खेळाडूंसाठी प्रोत्साहन मिळणार आहे.

आंतरराष्ट्रीय ऍथलेटिक्स संघाने बुधवारी एक मोठी घोषणा केली. पॅरिस ऑलिंपिकमध्ये सुवर्णपदक जिंकणाऱ्या खेळाडूंना पुरस्काराची रक्कम म्हणून ५० हजार डॉलर म्हणजे ४१.६० लाख रुपये देण्याची घोषणा करण्यात आली आहे. गेल्या म्हणजे टोकियो ऑलिंपिक स्पर्धेत भारताचा भालाफेकपटू नीरज चोप्राने सुवर्णपदक जिंकले होते. आता पॅरिस ऑलिंपिकमध्ये देखील त्याच्याकडून सुवर्णपदकाची आशा आहे. ऍथलेटिक्स संघटनेने बुधवारी दिलेल्या माहितीनुसार ट्रॅक आणि फिल्ड ऍथलेटिक्समधील सर्व सुवर्णपदक विजेत्यांच्या पुरस्कार रक्कमेत वाढ करण्यात आली आहे.

ऍथलेटिक्स संघटनेच्या या निर्णयामुळे २०२८ साली लॉस एंजिलिस येथे होणाऱ्या ऑलिंपिक स्पर्धेतील पदक विजेत्यांना पुरस्कार देण्याचा मार्ग मोकळा झाला आहे.

टोकियो ऑलिंपिक प्रमाणेच भारताला पॅरिस ऑलिंपकमधून नीराज चोप्राकडून सुवर्णपदकाची आशा असेल. त्याने टोकियोत देशासाठी ऍथलेटिक्समधील पहिले सुवर्ण जिंकून दिले होते. वैयक्तीक स्पर्धेत भारतासाठीचे हे दुसरे सुवर्ण होते. नीरजच्या आधी नेमबाजीत अभिनव बिंद्राने सुवर्ण मिळवले होते. या ऐतिहासिक निर्णयामुळे जागतिक ऍथलेटिक्स संघ हा ऑलिंपिक खेळात पुरस्कार म्हणून रक्कम देणारा पहिला आंतरारष्ट्रीय संघ ठरला आहे.

आंतरराष्ट्रीय ऍथलेटिक्स संघ हा ऑलिंपिक खेळात पुरस्कार रक्कम देणारा पहिला संघ ठरणार आहे, असे संघाने एका पत्रकात म्हटले आहे. अशा प्रकारे रक्कम देण्याची सुरुवात होणे हा एक महत्त्वाचा क्षण आहे. आंतरराष्ट्रीय ऑलिंपिक संघटनेकडून एकूण उत्पन्नातील १८.६३ अब्ज रुपये पुरस्कार म्हणून देण्याचे ठरवले आहे. ही रक्कम ऍथलेटिक्समधील ४८ खेळात सुवर्ण पदक जिंकणाऱ्या खेळाडूंना दिली जाईल.

आजच्या घोषणेसोबत २०२८च्या ऑलिंपिक स्पर्धेत रौप्य आणि कांस्यपदक जिंकणाऱ्या खेळाडूंना पुरस्कार म्हणून रक्कम देण्याची वचनबद्धतेचा समावेश आहे. रिले संघाना देखील अशा प्रकारचे पुरस्कार म्हणून रक्कम दिली जाणार आहे. जे संघातील खेळाडूंमध्ये विभागली जाईल.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-10T14:59:01Z dg43tfdfdgfd