ओव्हर सुरु करण्यासाठी आता मिळणार 'इतकाच 'वेळ, जाणून घ्या ICC च्या स्टॉप क्लॉक नियमाविषयी

वृत्तसंस्था, दुबई : साठ सेकंदांत अर्थात एका मिनिटात नवे षटक सुरू करण्याचे कठोर बंधन असलेल्या ‘स्टॉप क्लॉक’ नियमाची अंमलबजावणी करण्याचा निर्णय आंतरराष्ट्रीय क्रिकेट परिषदेने (आयसीसी) घेतला आहे. याची अंमलबजावणी वर्ल्ड कप टी-२० स्पर्धेपासून होईल.

आयसीसीने गत वर्षीच्या डिसेंबरपासून स्टॉप क्लॉक नियमाचा प्रयोग सुरू केला. त्याचा खेळाच्या नियमावलीत १ जून २०२४ पासून समावेश करण्याचे ठरले आहे. ‘स्टॉप क्लॉक नियमाची अंमलबजावणी जून २०२४पासून कायमस्वरुपी होईल. त्यास वेस्ट इंडिज आणि अमेरिकेत होणाऱ्या वर्ल्ड कप टी-२० स्पर्धेपासून सुरूवात होईल,’ असे आयसीसीने जाहीर केले. या नियमाची चाचणी २०२४च्या एप्रिलपर्यंत घेण्याचे ठरले होते; मात्र या नियमाचा खूपच फायदा होत आहे. काही वनडे सामन्यांचा कालावधी वीस मिनिटांनी कमी झाला, असे आयसीसीने सांगितले.

या नियमानुसार क्षेत्ररक्षण करणाऱ्या संघाला नवे षटक पूर्वीचे षटक संपल्यानंतर ६० सेकंदांत सुरू करण्याचे बंधन असेल. मैदानात ६० ते ० ही वेळ दाखवणारे काउंटडाऊन घड्याळ असेल. दूरचित्रवाणी पंच हे घड्याळ प्रत्येक षटकानंतर सुरू करतील. निर्धारीत साठ सेकंदांत षटक पूर्ण न झाल्यास संघास ताकीद देण्यात येईल. ही ताकिद जास्तीत जास्त दोन वेळा देण्यात येईल. त्यानंतर पाच धावांचा दंड त्यानंतरच्या चुकीच्या वेळी करण्यात येईल.

आयसीसीने या नियमातून काही सुटही दिली आहे. त्यात सुरू झालेले स्टॉप क्लॉक थांबवण्याचा अधिकार पंचांना असेल. त्यात फलंदाज अखेरच्या चेंडूवर बाद झाल्यास हे घड्याळ सुरू होणार नाही. त्याचबरोबर ड्रिंक्स ब्रेकच्या वेळीही थांबवले जाईल. त्याचबरोबर फलंदाज किंवा क्षेत्ररक्षकावर मैदानात उपचार सुरू असल्यासही ते घड्याळ थांबवण्याचे ठरले आहे. त्याचबरोबर क्षेत्ररक्षण करणाऱ्या संघाची कोणतीही चुक नसल्यासही कारवाई होणार नाही.

उपांत्य लढतीसाठीही राखीव दिवस

वर्ल्ड कप टी-२० क्रिकेट स्पर्धेतील उपांत्य; तसेच अंतिम लढतीसाठी राखीव दिवसाची तरतूद करण्यात आली आहे. ‘सुपर एट’ टप्प्यापासून धावांचे संरक्षण करणाऱ्या संघाने किमान पाच षटके टाकल्यासच सामना निकाली होईल. त्याच वेळी बाद फेरीच्या लढतीच्या वेळी हीच मर्यादा किमान दहा षटकांची असेल.

भारतातील स्पर्धा २० संघांची

- २०२६ची वर्ल्ड कप टी-२० स्पर्धा भारत आणि श्रीलंकेत संयुक्तपणे

- या स्पर्धेत वीस संघांत चुरस होणार

- स्पर्धेसाठी १२ संघ थेट पात्र होणार, अन्य आठ संघ पात्रता स्पर्धेद्वारे

- स्पर्धेसाठी २०२४च्या वर्ल्ड कप टी-२० स्पर्धेतील अव्वल आठ संघ थेट पात्र

- उर्वरित थेट पात्र संघाची टी-२० क्रमवारीनुसार निवड

- अंतिम आठ संघ आयसीसीच्या विभागीय पात्रता स्पर्धेतील कामगिरीनुसार

2024-03-16T08:49:58Z dg43tfdfdgfd