ग्लेन मॅक्सवेलने आरसीबीच्या पराभवानंतर अखेर मौन सोडलं, संघाबाहेर केल्याबद्दल म्हणाला की...

नवी दिल्ली : आरसीबीने ग्लेन मॅक्सवेलला हैदराबादच्या सामन्यासाठी संघाबाहेर केले होते. यावेळी सर्व चाहत्यांना हा मोठा धक्का होता. पण आरसीबीच्या पराभवानंतर आता मॅक्सवेलने याबाबतचे मौन सोडले आहे. आपल्याला संघाबाहेर का ठेवण्यात आले, याबाबतचे मोठे वक्तव्य मॅक्सवेलने केले आहे.

आरसीबी आणि हैदाराबाद यांच्यातील सामन्यांत सर्वांनाच ग्लेन मॅक्सवेलची आठवण नक्कीच आली असेल. कारण या सामन्यात धावांचा पाऊस पाहायला मिळाला. ट्रेव्हिस हेडने फक्त २९ चेंडूंत अर्धशतक झळकावले. त्यामुळे हैदराबादच्या संघाला इतिहास लिहिता आला. कारण हैदराबादने आयपीएलच्या इतिहासातील सर्वाधिक २८७ धावसंख्या रचली. त्यानंतर आरसीबीने ६ षटकांत ७० धावा केल्या होत्या. पण विराट कोहली बाद झाला आणि आरसीबी सामना हरणार असेल वाटत होते. पण त्याचवेळी दिनेश कार्तिकने ८३ धावांची धडाकेबाज खेळी साकारली आणि सामन्यात रंग भरले. पण या सामन्याच जर मॅक्सवेल असला असता तर कदाचित सामन्याचा निकाल वेगळा लागू शकला असता, अशी चर्चा चाहत्यांमध्ये आहे. पण मॅक्सवेलला तर आरसीबीने संघाबाहेर बसवले होते.

आरसीबीच्या पराभवानंतर मॅक्सवेल म्हणाला की, " काही वेळेला ब्रेक हा चांगला असतो. मुंबई इंडियन्सविरुद्ध आमचा वानखेडेवर सामना झाला होता. या सामन्यात आमचा पराभव झाला होता. त्यानंतर मी कर्णधार फॅफकडे गेलो होतो. त्यावेळी मी फॅफला सांगितले होते की, माझ्याकडून चांगली कामगिरी होत नसल्याचे दिसत आहे. त्यामुळे माझ्याजागी जर कोणाला संधी द्यायची असेल तर तु देऊ शकतोस. यामुळे मला मानसीक आणि शारीरिक आराम मिळेल आणि त्याचबरोबर फिट होण्यासही मदत होईल. हा ब्रेक माझ्यासाठी महत्वाचा आहे. आता यापुढे कधीही आरसीबीच्या संघाला माझी गरज लागली तर नक्कीच मी त्यांच्या सेवेत सादर असेन."

आरसीबीचे चार आधारस्तंभ आहेत. फॅफ, विराट, मॅक्सवेल आणि कार्तिक. पण यामधील मॅक्सवेल गेल्या सामन्यात नव्हता, त्यामुळे त्यांना पराभव पत्करावा लागल्याचे चाहते म्हणत आहेत. त्यामुळे आता मॅक्सवेल पुन्हा आरसीबीच्या संघात येणार का, याकडे सर्वांचे लक्ष लागलेले असेल.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-16T12:37:26Z dg43tfdfdgfd