चेन्नईकडून पहिल्याच मॅचमध्ये पदार्पण करणारा समीर रिझवी आहे तरी कोण, जाणून घ्या....

गोपाळ गुरव : आयपीएल क्रिकेट स्पर्धेला सुरुवात झाली आणि एका नव्या चेहऱ्याला चेन्नई सुपर किंग्ज संघाने पदार्पणाची संधी दिली. हा नवीन चेहरा आहे तो समीर रिझवी.

समीर रिझवी केवळ २० वर्षांचा आहे. तो मूळचा उत्तर प्रदेशातील मेरठमधील आहे. देशांतर्गत क्रिकेटमध्ये तो केवळ ११ टी-२० सामने खेळला आहे. त्याला चेन्नईने मागील लिलावात ८.४ कोटी रुपयांत खरेदी केले होते. तेव्हापासूनच समीर चर्चेत आहे. लिलावात त्याला आपल्या गोटात सामावून घेण्यासाठी गुजरात टायटन्स आणि दिल्ली कॅपिटल्स यांच्यात स्पर्धा होती. त्याची मूळ आधारभूत किंमत २० लाख रुपये होती.

चेन्नई संघाचे फलंदाजी प्रशिक्षक माइक हसी यांनी काही दिवसांपूर्वीच समीरला अंतिम अकरामध्ये संधी मिळेल, असे संकेत दिले होते. तो चेन्नई संघात अंबटी रायुडूची जागा घेऊ शकतो, असे हसी म्हणाले होते. माजी खेळाडू सुरेश रैना यानेही समीरला पाठिंबा दिला होता. त्यामुळे मधल्या फळीत रिझवी खेळू शकतो. गरज पडल्यास मोठे फटके मारण्याची समीरची क्षमता आहे. तो चेन्नई संघात ‘फिनिशर’ची भूमिका निभावू शकतो. कारण,आता महेंद्रसिंह धोनी केवळ मार्गदर्शकाच्या भूमिकेत आहे. तो आठव्या क्रमांकावर फलंदाजीस येतो. भविष्याचा विचार करता चेन्नई नवोदितांना अधिकाधिक संधी देत आहे.

दुसरी बाब म्हणजे चेन्नई संघातील शिवम दुबेन नुकताच दुखापतीतून सावरला आहे. त्यामुळे लगेचच त्याच्याकडून मोठ्या अपेक्षा करणे चेन्नईला शक्य नाही. समीर फिरकीविरुद्ध चांगली फलंदाजी करतो. घरच्या मैदानावर समीर चेन्नईसाठी हुकमी एक्का ठरू शकतो. मंगळवारी झालेल्या सराव सामन्यात त्याने २० चेंडूंत ५५ धावांची खेळी करून संघव्यवस्थापनाचे लक्ष वेधून घेतले होते.

मेरठमधील लालकुर्ती भागात समीर राहतो. त्याने यूपी लीगमध्ये आक्रमक फलंदाजी केली होती. त्यामुळे लिलावापूर्वीच तो चर्चेत आला होता. त्याने या लीगमध्ये ४००हून अधिक धावा फटकारल्या होत्या. यात ३५ षटकारांचा समावेश होता. आता पदार्पणाच्या लढतीत तो काय कमाल दाखवितो, याबाबत उत्सुकता आहे.

रैनाने दिला होता गॉगल

समीरवर सर्वांत आधी लक्ष गेले होते ते चेन्नईचा माजी अष्टपैलू सुरेश रैनाचे. त्याने त्याच्यातील गुणवत्ता हेरली. एका लढतीदरम्यान रैनाने त्याला आपला गॉगलही गिफ्ट म्हणून दिला होता. १६ वर्षांखालील गटात रिझवी सलामीला येत होता. वयाच्या १६व्या वर्षी त्याने प्रथम श्रेणी क्रिकेटमध्ये श्रीगणेशा केला आहे. यूपी लीगमध्ये त्याने केवळ ४७ चेंडूंत शतक ठोकले होते.

समीर रिझवीसाठी ही एक मोठी संधी आहे. त्यामुळे या संधीचे सोने समीर रिझवी कसे करतो, याकडे सर्वांचे लक्ष लागलेले असेल.

2024-03-22T15:50:34Z dg43tfdfdgfd