जडेजाचा कुठे गेम झाला? कर्णधारपदी ऋतुराजची का झाली निवड? असा आहे धोनीने गेम प्लॅन

चेन्नई: आयपीएल २०२४मधील पहिल्याच मॅचच्या एक दिवस आधी गतविजेते चेन्नई सुपर किंग्जने नव्या कर्णधाराची घोषणा केली. चेन्नई संघाला ५ वेळा विजेतेपद मिळून देणाऱ्या महेंद्र सिंह धोनीने नेतृत्व ऋतुराज गायकवाडकडे सोपवले. गेल्याच म्हणजे आयपीएल २०२२ मध्ये धोनीने रविंद्र जडेजाकडे नेतृत्व सोपवले होते. पण तो प्रयोग यशस्वी झाला नाही आणि धोनीला पुन्हा संघाचे नेतृत्व करावे लागले. आता धोनीचा हा अखेरचा हंगाम असल्याची चर्चा सुरू असताना चेन्नई संघाने पुन्हा एकदा नेतृत्वात बदल केला आहे.

युवा सलामीवीर आणि आयपीएलमध्ये आक्रमक फलंदाजीमुळे चर्चेत असलेल्या ऋतुराज गायकवाडकडे नेतृत्व दिल्याने अनेकांना आश्चर्य वाटले. चेन्नई संघात धोनीनंतर कर्णधारपदासाठीचा आघाडीचा दावेदार रविंद्र जडेजा होता. अशात जडेजाला मागे टाकत ऋतुराजला कर्णधार का करण्यात आले. या निर्णयामागे देखील धोनीचा मोठा गेम प्लॅन दिसतोय.

धोनीच्या जागेवर रविंद्र जडेजा हाच कर्णधारपदासाठी आघाडीवर होता. याआधी जडेजाकडे नेतृत्व देण्यात आले होते पण संघाला अपयश झाले. त्यामुळे ऐन हंगामाच्या मध्यावर धोनीला पुन्हा कर्णधारपदाची जबाबदारी स्विकारावी लागली होती. आता धोनीने ऋतुराजकडे नेतृत्व देऊन मोठा दाव लावला आहे.

आयपीएल २०२४ मध्ये चेन्नईची पहिली लढत आरसीबीविरुद्ध होणार आहे. धोनीच्या नेतृत्वाखाली चेन्नईने अखेरचे विजेतेपद मिळवले.हे वर्ष धोनीचे अखेरचे वर्ष असण्याची शक्यता व्यक्त केली जात आहे. असे झालेच तर धोनीला एका हंगामात ऋतुराजला अनेक गोष्टी शिकवता येतील. ज्याचा फायदा संघाला पुढील अनेक हंगामात होऊ शकतो.

आयपीएलमधील सर्वात यशस्वी संघापैकी एक असलेल्या चेन्नईचे नेतृत्व करणे ही वाटते तितकी सोपी गोष्ट नाही. कारण धोनीने ५ विजेतेपद मिळून दिली आहेत. १७व्या हंगामात चेन्नई संघाचे नेतृत्व हे सर्वात आव्हानात्मक ठरणार आहे.

चेन्नईचे आयपीएलच्या पहिल्या टप्प्यातील वेळापत्रक

२२ मार्च- चेन्नई विरुद्ध बेंगळुरू- रात्री ८ वाजता, चेन्नई.

२६ मार्च- चेन्नई विरुद्ध गुजरात- रात्री ७.३० वाजता, चेन्नई

३१ मार्च- दिल्ली विरुद्ध चेन्नई- रात्री ७.३० वाजता, विशाखापट्टणम

०५ एप्रिल- हैदराबाद विरुद्ध चेन्नई- रात्री ७.३० वाजता, हैदराबाद.

2024-03-21T12:48:02Z dg43tfdfdgfd