जसप्रीत बुमराने रचला इतिहास, आतापर्यंत अशी कामगिरी कोणालाच करता आलेली नाही

मुंबई : जसप्रीत बुमराहने आरसीबीच्या संघाविरुद्ध पाच विकेट्स मिळवल्या आणि मुंबई इंडियन्सच्या विजयात सिंहाचा वाटा उचलला. बुमराहने अचूक आणि भेदक गोलंदाजी करत एक मोठा विक्रम आपल्या नावावर केला आहे आणि त्याचबरोबर इतिहास रचला आहे.

आरसीबीच्या सामन्यात बुमराह लक्षवेधी ठरला. पाच विकेट्स मिळवणाऱ्या बुमराहला यावेळी सामनावीर या पुरस्कराने गौरवण्यात आले. आपल्या पहिल्याच षटकांत विराट कोहलीला चकवलेल्या जसप्रीत बुमराहला डावाच्या अखेरच्या षटकांत दोनदा हॅटट्रीक करण्याची संधी होती. त्याने लौकिकास साजेसा मारा करताना अखेरच्या षटकांत धावाही रोखण्याचा प्रयत्न केला. त्यानंतर बुमराहने आरसीबीचा कर्णधार फॅफ ड्यु प्लेसिसलाही बाद केले आणि मुंबई इंडियन्सला सर्वात मोठे यश मिळवून दिले. बुमराहने या देदिप्यमान कामगिरीनंतर इतिहास रचला आहे.

आयपीएलमध्ये आता बुमराहकडे पर्पल कॅप आली आहे, पण त्यापेक्षाही मोठी कामगिरी त्याने केली आहे. आतापर्यंतच्या आयपीएलच्या इतिहासामध्ये जी गोष्ट कधीच घडली नव्हती ती बुमराहने करून दाखवली आहे. आरसीबी हा फलंदाजांना संघ म्हणून ओळखला जातो. त्यामुळे आरसीबीविरुद्ध आतापर्यंतच्या सामन्यात कोणत्याही गोलंदाजाला अशी कामगिरी करता आली नव्हती. आतापर्यंत आरसीबीच्या पाच फलंदाजांना बाद करण्याचा पराक्रम कोणालाही करता आला नव्हता. पण या सामन्यात मात्र बुमराहने आरसीबीच्या पाच फलंदाजांना बाद केले आणि इतिहास रचला. त्यामुळे आता बुमराहच्या नावावर एक मोठा विक्रम जमा झाला आहे. आयपीएलमध्ये निम्मा संघ बाद करण्याचा पराक्रम दोनदा फक्त आतापर्यंत चार गोलंदाजांना करता आले आहे. यापूर्वी जेम्स फॉकनर, जयदेव उनाडकत, भुवनेश्वर कुमार यांनी हा पराक्रम केला होता. यामध्ये आता जसप्रीत बुमराहचेही नाव आले आहे. त्यामुळे हा अनोखा विक्रमही आता बुमराहच्या नावावर जमा झाला आहे.

दिनेश कार्तिकने अखेरच्या षटकांत मुंबई इंडियन्सच्या अन्य गोलंदाजांना लक्ष्य केले. त्यामुळे रॉयल चॅलेंजर्स बेंगळुरूने अखेरच्या पाच षटकांत ६६ धावांचा चोप दिला. बेंगळुरूने आयपीएल टी-२० क्रिकेट स्पर्धेत गुरुवारी मुंबई इंडियन्सविरुद्ध ८ बाद १९६ धावसंख्या उभारली. मुंबईने अखेरच्या पाच षटकांत ६६ धावा दिल्या. त्यातील दोन षटके बुमराहची होती. त्याने त्यात १४ धावांत चार विकेट घेतल्या, पण अन्य गोलंदाजांनी तीन षटकांत ५२ धावा दिल्या.

जसप्रीत बुमराह हा सध्याच्या घडीला भन्नाट फार्मात आहे. त्यामुळे आता आगामी सामन्यांमध्ये बुमराह कशी कामगिरी करतो, याकडे आता सर्वांचे लक्ष लागलेले असेल.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-12T08:12:49Z dg43tfdfdgfd