झुकलेले खांदे, निराश चेहरा, मान खाली घालून रोहित चुपचाप निघून गेला; डोळ्यात पाणी हा व्हिडिओ पाहून

मुंबई: आयपीएलमधील एल क्लासिको या नावाने ओळखली जाणारी मुंबई इंडियन्स आणि चेन्नई सुपर किंग्ज यांच्यातील लढत काल रविवारी १५ एप्रिल रोजी मुंबईच्या वानखेडे स्टेडियमवर झाली. टॉस जिंकून मुंबई इंडियन्सने त्यांना हवा असलेला निर्णय देखील घेतला होता. टॉस जिंकून मुंबईने अर्धी मॅच जिंकली याचा आनंद कर्णधार हार्दिकच्या चेहऱ्यावर स्पष्टपणे दिसत होता. इतक काय तर हिटमॅन रोहित शर्माने नाबाद शतकी खेळी करून देखील मुंबई इंडियन्सचा वानखेडेवर दुसऱ्या डावात फलंदाजी करताना पराभव झाला. केवळ अशक्य वाटणारी ही गोष्ट काल हजारो चाहत्यांनी मैदानावर पाहिली.

रोहित शर्माने १२ वर्षानंतर आयपीएलमध्ये शतक झळकावले. त्याने ६३ चेंडूत १६६च्या स्ट्राइक रेटने नाबाद १०५ धावा केल्या. त्याच्या खेळीत ११ चौकार आणि ५ षटकारांचा समावेश होता. मुंबईकडून ईशान किशन वगळता अन्य फलंदाज हजेरी लावण्यासाठी आले की काय चित्र दिसले. सलामीला आलेला रोहित शर्मा अखेरपर्यंत मैदानावर लढला पण मुंबईच्या एकाही फलंदाजाने त्याला साथ दिली नाही.

मॅच झाल्यानंतर रोहित शर्माचा एक व्हिडिओ सोशल मीडियावर चर्चेत आला जो पाहिल्यानंतर चाहत्यांच्या डोळ्यात पाणी येईल. हा व्हिडिओ पाहिल्यानंतर मुंबई इंडियन्स, रोहित शर्माचे नाही तर क्रिकेटच्या कोणत्याही चाहत्याचा कंठ दाटून येईल.

चेन्नईचा विजय झाल्यानंतर दोन्ही संघांचे खेळाडू एकमेकांना भेटत होते. रोहितने औपचारिकता म्हणून काही खेळाडूंशी हात मिळवले आणि तो एकटाच मान खाली घालून ड्रेसिंग रुमकडे गेला. रोहितच्या चेहऱ्यावरून आणि हावभावावरून स्पष्टपणे दिसत होते की, त्याला शतकाचा कसलाही आनंद झालेला नाही. तो कोणालाही न भेटता थेट ड्रेसिंग रुममध्ये गेला.

मुंबई इंडियन्सचा ६ सामन्यातील हा चौथा पराभव असून ते ४ गुणांसह गुणक्त्यात आठव्या स्थानावर आहेत. मुंबईच्या पुढील चार लढती बाहेरच्या मैदानावर आहेत. तर एकूण ८ पैकी ५ लढती बाहेर असतील आणि घरच्या मैदानावर त्यांना ३ लढती खेळायच्या आहेत.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-15T16:06:30Z dg43tfdfdgfd