टी-२० क्रिकेटमध्ये ना धोनी, ना विराट फक्त हिटमॅनच...; मॅच जिंकली मुंबई इंडियन्सने, सर्वात मोठा विक्रम झाला रोहित शर्माच्या नावावर

मुंबई: आयपीएल २०२४ मधील रविवार मुंबई इंडियन्ससाठी आनंदाची बातमी देणारा ठरला. सलग ३ पराभवानंतर मुंबईने चौथ्या लढतीत दिल्ली कॅपिटल्सचा पराभव करत पहिल्या विजयाची नोंद केली. मुंबई इंडियन्सच्या या विजयात हिटमॅन रोहित शर्माने असा विक्रम केला जो आजवर एकाही भारतीय क्रिकेटपटूला करता आला नाही.

आयपीएलच्या अनेक हंगामात रोहित शर्माची कामगिरी चांगली झाली नाही. पण एकूणच टी-२० क्रिकेटमध्ये रोहित शर्माचे रेकॉर्ड नेहमीच दमदार राहिले आहे. या फॉर्मेटमध्ये शतक करणारा तो पहिला भारतीय खेळाडू ठरला होता. कर्णधार म्हणून रोहितने टी-२० मध्ये एकही फायनल मॅच गमावलेली नाही. सर्वाधिक आंतरराष्ट्रीय टी-२० मॅच खेळणारा पुरुष क्रिकेटपटू अशी देखील रोहितची ओळख आहे.

रविवारी दिल्ली विरुद्ध विजय मिळवणाऱ्या रोहितने २५० टी-२० मॅच जिंकणारा पहिला भारतीय क्रिकेटपटू होण्याचा मान मिळवला. २००७ साली टी-२० क्रिकेटमध्ये पदार्पण करणाऱ्या रोहित सर्वाधिक टी-२० मॅच जिंकणारा भारतीय खेळाडू झाला आहे. त्याने आतापर्यंत ४३० मॅच खेळले आहेत. ज्यातील २५० मॅच जिंकल्या आहेत. २००७ साली टी-२० वर्ल्डकपमध्ये रोहितने इंग्लंडविरुद्ध पदार्पण केले होते. याच सामन्यात युवराज सिंगने स्टुअर्ट ब्रॉडला एका ओव्हरमध्ये ६ षटकार मारले होते.

सर्वाधिक टी-२० मॅच विजयाच्याबाबत रोहित शर्माच्या जवळपास देखील अन्य कोणी भारतीय खेळाडू दिसत नाही. २२२ विजयांसह धोनी दुसऱ्या क्रमांकावर आहे. धोनीने ३८१ टी-२० मॅच खेळल्या आहेत. रोहित फक्त भारतीय संघ आणि आयपीएलमध्ये डेक्कन चार्जर्स आणि मुंबई इंडियन्सकडून खेळला आहे.

जागतिक क्रिकेटमध्ये सर्वाधिक टी-२० मॅच जिंकण्याचा विक्रम वेस्ट इंडिजच्या कायरन पोलार्डच्या नावावर आहे. जगभरातील अनेक टी-२० लीगमध्ये असलेल्या पोलार्डने ३५९ टी-२० मॅचमध्ये विजय मिळवला आहे. या यादीत दुसऱ्या क्रमांकावर पाकिस्तानचा शोएब मलिक असून त्याने ३२५ मॅच जिंकल्या आहेत. ३२० टी-२० विजयासह ड्वेन ब्रावो तिसऱ्या, २८६ विजयासह सुनील नरेन तिसऱ्या तर आंद्रे रसेल चौथ्या क्रमांकावर आहे.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-08T09:29:21Z dg43tfdfdgfd