टी-२० वर्ल्ड कपमध्ये रोहित कर्णधार, पण उप कर्णधारपद कोणाला मिळणार जाणून घ्या...

नवी दिल्ली : टी-२० वर्ल्ड कपसाठी भारतीय संघाची घोषणा लवकरच केली जाणार आहे. पण या संघाचा कर्णधार रोहित शर्मा असेल, हे निश्चित आहे. पण या संघात उप कर्णधार नेमका कोण असेल, हेदेखील आता स्पष्ट होताना दिसत आहे.

आयपीएल संपल्यावर लगेचच टी-२० वर्ल्ड कपला सुरुवात होणार आहे. त्यामुळे आयपीएल अखेरच्या टप्प्याकडे वळत असताना आता टी-२० संघाची घोषणा कधीही होऊ शकते. भारताचा संघ जेव्हा जाहीर होईल, तेव्हा बऱ्याच जणांना धक्का बसेल, असे म्हटले जात आहे. कारण या संघातून काही नामांकित खेळाडूंना डच्चू देण्यात येणार असल्याचे समजते आहे. पण त्याचवेळी भारतीय संघाचा उप कर्णधार नेमका कोण असेल, यासाठी दोन खेळाडूंची नावं आता चर्चेत आली आहे. त्यामुळे या दोघांपैकी कोण उप कर्णधार होणार, याची जोरदार चर्चा रंगत चालली आहे.

रोहित हा टी-२० क्रिकेटपासून गेले काही दिवस दूर होता. त्यावेळी भारतीय संघाचे नेतृत्व हे हार्दिक पंड्याकडे सोपवण्यात आले होते. पण सध्याच्या घडीला हार्दिक हा मुंबई इंडियन्सचे कर्णधारपद भूषवताना अपयशी ठरत आहे. कारण हार्दिकच्या नेतृत्वाखाली मुंबईचा संघ अपयशी ठरत आहे. त्यामुळे हार्दिकला संघाचे उप कर्णधारपद कसे द्यायचे, याचा विचार बीसीसीआय करत आहे. हार्दिकसाठी आता बीसीसीआयने एक उत्तम पर्याय शोधून काढला आहे. बीसीसीआय यावेळी टी-२० वर्ल्ड कपचे उप कर्णधारपद हे ऋषभ पंतला देऊ शकते, असे समोर येत आहे. कारण पंत हा अजून किमान ६-७ वर्षे टी-२० क्रिकेट खेळू शकतो. त्यामुळे रोहित शर्मानंतर ऋषभला थेट कर्णधार करताना बीसीसीआयला कोणतीही समस्या येणार नाही. त्यामुळे आता उप कर्णधारपदासाठी हार्दिक आणि ऋषभ यांच्यात चुरस असल्याचे समोर येत आहे. त्यामुळे आता भारताचा उप कर्णधार कोण होणार, याची उत्सुकता सर्वांनाच लागलेली असेल.

टी-२० वर्ल्ड कपसाठी येत्या २-३ दिवसांत भारतीय संघ जाहीर करण्यात येणार आहे. यावेळी भारतीय संघाचा उप कर्णधार कोण असेल, हे निश्चित होणार आहे.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-29T14:09:45Z dg43tfdfdgfd