डेरवण यूथ गेम्स २०२४ ला भरभरून प्रतिसाद, ४ हजारांहून अधिक खेळाडूंचा सहभाग

प्रतिनिधी : बारावीच्या नुकत्याच संपलेल्या परीक्षा, दहावीचे सुरू असलेले पेपर, तोंडावर आलेल्या शालेय विद्यार्थ्यांच्या परीक्षा आणि ऐन भरात असलेला कोकणातील शिमग्याचा सण, असे वातावरण असले तरी ‘डेरवण यूथ गेम्स २०२४’ या क्रीडा महोत्सवाला दरवर्षीप्रमाणे भरभरून प्रतिसाद लाभला. १८ प्रकारचे खेळ, त्यात आपले कौशल्य पणाला लावणारे खेळाडू, त्यांचे प्रशिक्षक आणि खेळाडूंना प्रोत्साहन देणारे हजारो क्रीडाप्रेमींनी डेरवण येथील एसव्हीजेसीटीचे क्रीडासंकुल गजबजले होते.

शिवजयंतीनिमित्त दरवर्षी आयोजित केल्या जाणाऱ्या डेरवण यूथ गेम्सचे (डीवायजी) यंदा दहावे वर्ष होते. सुमारे ४ हजारांहून अधिक खेळाडूंनी महोत्सवात आपला सहभाग नोंदविला होता. महोत्सवाच्या सहाव्या दिवशी, वैयक्तिक पातळीवर १,४७९ खेळाडूंनी यात भाग घेतला आहे. तर सांघिक पातळीवर विचार करता २,७९२ खेळाडू यात सहभागी झाले होते. कोकणातील गावागावांतून, मुंबई, पुणे, नाशिक, कोल्हापूर, सांगली, सातारा येथून संघ, खेळाडू या क्रीडानगरीत दाखल झाले होते. २८ मार्च, श्री शिवजयंतीच्या दिवशी या महोत्सवाचा समारोप होणार आहे.

मार्च महिना हा परीक्षांचा म्हणून ओळखला जातो. तसेच दरवर्षी यादरम्यान शिमगोत्सव साजरा होत असतो. परंतु कोकणातील महत्त्वाचा सण साजरा होत असतानाही कोकणातील खेळाडूंची, क्रीडाप्रेमींची पावले डेरवणकडे वळली होती. जलतरण, कबड्डी, खो-खो, टेबलटेनिस, बॅडमिंटन, जिम्नॅस्टीक, मल्लखांब, रायफल शूटिंग, योग, फूटबॉल. लंगडी, कॅरम, बुद्धिबळ, वॉल क्लायम्बिंग अशा विविध खेळांत खेळाडूंनी आपले कौशल्य पणाला लावले. गुणवान खेळाडूंनी आपल्या क्रीडाकौशल्याचे प्रदर्शन करून पदकांची लयलूट केली. पदकविजेत्यांना मान्यवरांच्या हस्ते गौरविण्यात आले. येथील संपूर्ण वातावरणच क्रीडामय होऊन गेले होते. कोकणवासीयांनीही या क्रीडा महोत्सवाचा आनंद घेतला.

१०४ बुद्धिबळपटूंचा सहभाग‘डेरवण यूथ गेम्स २४’च्या बुद्धिबळ स्पर्धेत कोल्हापूरच्या शंतनू पाटील (१५५४) या प्रथम मानांकित खेळाडूने अपेक्षेनुसार प्रथम क्रमांक पटकाविला. तर सांगलीच्या ईशान कुळकर्णी (१५४०) या बुद्धिबळपटूने सरस खेळ करून द्वितीय क्रमांक पटकावित सर्वांचे लक्ष वेधून घेतले. रत्नागिरीच्या सई प्रभूदेसाईने मुलींच्या गटात प्रथम क्रमांक पटकाविला. रत्नागिरीच्याच निधी मुळ्येने अनरेटेड प्लेअर यात प्रथम क्रमांक मिळविला.

विहंग मंडळाला विजेतेपदखो खोमध्ये १४ वर्षांखालील मुलांच्या गटात राजेंद्र विद्यालय, खंडाळा सातारा मुलींच्या गटात राजमाता अहिल्यादेवी होळकर, सांगली या संघांनी तर १८ वर्षाखालील गटात विहंग क्रीडा मंडळ, ठाणे , तर मुलींच्या गटात ज्ञानविकास-ठाणे संघांनी विजेतेपद पटकावले.

2024-03-27T11:01:38Z dg43tfdfdgfd