तू छपरी आहेस! लाईव्ह मॅचमध्ये हार्दिक पंड्याचा चाहत्यांकडून तोंडावर अपमान, व्हिडिओ होतोय प्रचंड व्हायरल

अहमदाबाद: आयपीएलच्या १७व्या हंगामात रविवारी झालेल्या लढतीत गुजरात टायटन्सकडून मुंबई इंडियन्सचा ६ धावांनी पराभव झाला. अखेरच्या षटकापर्यंत रंगलेली ही लढत अनेक कारणांमुळे चर्चेत राहिली. मुंबई इंडियन्सकडून रोहित शर्मा कर्णधाराऐवजी एक खेळाडू म्हणून मैदानात दिसला. मुंबईचा कर्णधार जरी हार्दिक पंड्या असला तरी चाहत्यांचा पाठिंबा मात्र रोहित शर्माला होता हे मॅचमध्ये अनेकदा दिसून आले.

या लढतीत भारतीय संघातील स्टार ऑलराउडर आणि मुंबईचा कर्णधार हार्दिक पंड्याला चाहत्यांच्या नाराजीला सामोरे जावे लागले. मुंबई इंडियन्सच्या संघ व्यवस्थापनाने हंगाम सुरू होण्याआधी गुजरात टायटन्सचा कर्णधार असलेल्या हार्दिकला संघात घेतले आणि रोहितच्या जागी मुंबईच्या कर्णधारपदी त्याची नियुक्ती केली. या निर्णयाने चाहते प्रचंड नाराज झालेले दिसले.

अहमदाबादच्या नरेंद्र मोदी स्टेडियमवर हार्दिक पंड्याने त्याचा आधीचा संघ असलेल्या गुजरात टायटन्सच्या घरच्या मैदानावर मुंबईचा कर्णधार म्हणून प्रथमच मॅच खेळली. हार्दिकवर दोन्ही संघाचे चाहते नाराज आहेत. मैदानावर चाहत्यांनी हार्दिकला मोठ्या प्रमाणात ट्रोल केले. मॅचमधील एक व्हिडिओ समोर आला आहे, ज्यात चाहत्यांनी हार्दिकला 'छपरी' असा शब्द वापरल्याचे दिसते.

नरेंद्र मोदी मैदानावर झालेल्या या लढतीतील एक व्हिडिओ व्हायरल होत आहे. ज्यात मुंबई इंडियन्सचा कर्णधार हार्दिक पंड्या डगआउटमधून ड्रेसिंग रुमकडे जात आहेज. तेव्हा जवळ असलेल्या चाहत्यांनी त्याला पाहून छपरी-छपरी अशा घोषणा दिल्या. हार्दिक पंड्याने यावर कोणतीही प्रतिक्रिया दिली नाही आणि तो थेट ड्रेसिंग रुममध्ये गेला. या घटनेचा व्हिडिओ सोशल मीडियावर चर्चेत आला आहे.

हार्दिक पंड्याला मुंबई इंडियन्सने आयपीएल २०२४च्या लिलावाआधीच गुजरात टायटन्सकडून ट्रेड केले होते. मुंबई संघात परत आल्यानंतर ५ वेळा आयपीएलचे विजेतेपद मिळवून देणाऱ्या रोहितच्या जागी कर्णधार म्हणून त्याची नियुक्ती करण्यात आली. रविवारी झालेल्या लढतीत गुजरातने प्रथम फलंदाजी करताना ६ बाद १६८ धावा केल्या. उत्तरादाखल मुंबईला ९ बाद १६२ धावा करता आल्या. मुंबई इंडियन्सची दुसरी लढत २७ मार्च रोजी सनरायझर्स हैदराबादविरुद्ध होणार आहे.

2024-03-25T10:12:01Z dg43tfdfdgfd