तेरे जीत से ज्यादा मेरे हार के चर्चे होंगे... धोनीने एका कृतीने जिंकली सर्वांची मनं, पाहा काय घडलं

विशाखापट्टणम : दिल्ली कॅपिटल्सने चेन्नई सुपर किंग्सवर दमदार विजय साकारला. पण दिल्लीचा विजय झाला असला तरी चर्चा सर्वात जास्त सुरु आहे ती महेंद्रसिंग धोनीची. धोनीने धडाकेबाज फलंदाजी केली खरी, पण सामना संपल्यावर धोनीने अशी एक गोष्ट केली की, पुन्हा एकदा सर्वांची मनं त्याने जिंकली. त्यामुळे एकच ह्दय आहे धोनी, ते किती वेळा जिंकशील, अशी चर्चा चाहत्यांमध्ये सुरु आहे.

या आयपीएलमध्ये धोनी यावेळी प्रथमच फलंदाजीला आला होता. धोनी जेव्हा फलंदाजीला आला तेव्हा स्टेडियम त्याच्या नावाने दणाणून गेले होते. सर्वत्र धोनीचा जयघोष सुरु झाला होता. चाहत्यांनी आपल्या मोबाईलच्या लाइट्स लावल्या आणि धोनीचे अनोखे स्वागत केले. स्टेडियममध्ये धोनीच्या नावाचे फलक दिसायला लागले. धोनीनेही यावेळी चाहत्यांना निराश केले नाही. धोनीने पहिल्याच चेंडूवर चौकार लगावला आणि चाहत्यांना गोड भेट दिली. या पहिल्या षटकाच्या अखेरच्या चेंडूवरही त्याने चौकार लगावला. दुसऱ्या षटकात धोनीने षटकार लगावला आणि चाहते आनंदाने उद्या मारायला लागले. अखेरच्या षटकात तर धोनीने कमालच केली. कारण धोनीने अखेरच्या षटकात दोन षटकार आणि दोन चौकारांसह २० धावांची वसूली केली. पण दिल्लीने हा सामना जिंकला, पण तरीही चर्चा धोनीच्या नावाचीच आहे. हा सामना संपल्यावर धोनीने मैदानात अशी एक गोष्ट केली की, त्यामुळे सर्वांचीच मनं त्याने जिंकली.

सामना संपल्यावर धोनी मैदानात होता. त्यावेळी या मैदानातील ग्राऊंड स्टाफ त्याच्या जवळ आला. जेव्हा एखादा संघ विजयी होतो, तेव्हा तो ग्राऊंड स्टाफबरोबर फोटो काढताना दिसतो. पण यावेळी धोनीचा संघ हरला होता. पण धोनीचं मन एवढं मोठं आहे की, त्याने या ग्राऊंड स्टाफला नकार दिला नाही. धोनीने फोटोसाठी होकार दिला आणि त्यानंतर ग्राऊंड स्टाफच्या मधोमध जाऊन धोनी उभा राहीला. शक्यतो कोणताही खेळाडू असा मध्यभागी उभा राहत नाही. पण धोनी त्यांच्यामध्ये जाऊन उभा राहीला आणि तिथेच त्याने सर्वांची मनं जिंकली.

धोनी हा सध्याच्या घडीला विजय आणि पराजयाच्या पुढे गेला आहे. सामना जिंकण्या-हरण्यापेक्षा धोनीला खेळताना पाहता यावं, यासाठी चाहते उत्सुक आहेत. त्यामुळे या आयपीएलमध्ये यावेळी जेव्हा धोनी फलंदाजीला येईल, तेव्हा त्याला सर्वात जास्त प्रतिसाद मिळेल. ही गोष्ट दिल्लीच्या सामन्यात पाहायला मिळाली खरी. पण आता यापुढील सामन्यांत धोनी कधी फलंदाजीला येतो, याची उत्सुकता सर्वांना असेल.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-01T08:13:08Z dg43tfdfdgfd