दिनेश कार्तिक हिरो बनायला गेला पण आरसीबीसाठी व्हिलन ठरला, नेमकं घडलं तरी काय जाणून घ्या...

कोलकाता : दिनेश कार्तिक सध्याच्या घडीला भन्नाट फॉर्मात आहे. त्यामुळे रविवारी आरसीबीच्या विजयाच्या आशा या दिनेशवरच होत्या. पण दिनेश यावेळी हिरो बनायला गेला आणि आरसीबीच्या पराभवाचा व्हिलन ठरल्याचे पाहायला मिळाले. मैदानात नेमकं काय घडलं हे आता समोर आले आहे.

केकेआरविरुद्धच्या सामन्यात दिनेश चांगल्या लयीत दिसत होता. दिनेश धडाकेबाज फटकेबाजी करत संघाला सामना जिंकवून देईल, असे वाटत होते. त्यामुळे यावेळी तरी दिनेश आरसीबीच्या विजयाचा हिरो ठरणार का, याची उत्सुकता सर्वांना होती. कारण हैदाराबादच्या सामन्यात त्याने झंझावाती अर्धशतक झळकावलं होतं. पण त्याला संघाला सामना जिंकवून देता आला नव्हता. पण यावेळी विजयाचे समीकरण तेवढे अवघड नक्कीच नव्हते. त्यामुळे दिनेश आता संघाला विजय मिळवून देईल असे वाटत होते. पण यावेळी १९ व्या षटकात दिनेशकडून एक चूक घडली आणि त्याचा फटका आरसीबीच्या संघालाही बसला.

१९ व्या षटकात दिनेश आणि आंद्रे रसेन हे आमने सामने होते. या षटकात दिनेश मोठे फटके मारण्याच्या तयारीत दिसत होता. पण त्याच्याकडून मोठे फटके काही लागत नव्हते. या षटकातील पहिल्या दोन्ही चेंडूवर त्याने एकही धाव घेतली नाही. त्यानंतर तिसऱ्या चेंडूवर त्याने षटकार मारला. त्यानंतर चौथ्या चेंडूवरही त्याने धाव घेतली नाही. पण पाचव्या चेंडूवर त्याने चौकार मारला आणि सहाव्या चेंडूवर तो बाद झाला. दिनेशने यावेळी या षटकातील तीन चेंडू वाया घालवले, त्यावर आरसीबीला एकही धाव घेता आली नाही. दिनेश ज्या कर्ण शर्माला स्ट्राइक देऊ पाहत नव्हतो, त्याच कर्णने अखेरच्या षटकात तीन षटकार लगावत सामना आरसीबीच्या बाजूने झुकवण्याचा प्रयत्न केला असता. आरसीबीला २ चेंडूंत ३ धावांची गरज होती आणि त्यावेळी कर्ण बाद झाला. पण तिथे जर दिनेशने वाया केलेले तीन चेंडू आरसीबीला मिळाले असते तर हा सामना आरसीबी जिंकू शकली असती. त्यावेळी दिनेश हिरो ठरायला गेला खरा, पण त्याच्या या गोष्टीमुळे आता तो चांगलाच ट्रोल होत आहे.

दिनेश कार्तिकने १८ व्या षटकात एकेरी धावा घेतल्या, पण १९ व्या षटकात मात्र त्याने एकेरी धाव घेण्यास नकार दिला. जर दिनेशने एकेरी धावा त्यावेळी घेतल्या असत्या तर कदाचित आरसीबी आणि केकेआरच्या सामन्याचा निकाल वेगळा लागू शकला असता. पण दिनेशच्या चुकीमुळे ते होऊ शकले नाही.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-21T15:30:10Z dg43tfdfdgfd