दिनेश कार्तिकच्या एका षटकारने रेकॉर्ड बुक बदलण्याची वेळ आली; RCB VS SRH मॅचने टी-२० क्रिकेटमध्ये इतिहास घडवला

बेंगळुरू: पॉवर हिटिंगसाठी ओळखला जाणारा दिनेश कार्तिकला सनरायझर्स हैदराबादविरुद्धच्या लढतीत रॉयल चॅलेंजर्स बेंगळुरूला विजय मिळवून देता आला नसला तरी या लढतीत त्याने अनेक विक्रम केले. पराभव होणार आहे हे माहिती असून देखील दिनेश कार्तिक अखेरपर्यंत लढला. कार्तिकच्या या खेळीमुळे टी-२० क्रिकेटच्या इतिहासात आजवर कधीही न झालेले विक्रम नोंदले गेले.

प्रथम फलंदाजी करणाऱ्या हैदराबाद संघाने आयपीएलच्या इतिहासातील सर्वोच्च धावसंख्याचे विक्रम केला. त्यांनी २० षटकात २८७ धावा केल्या. या हंगामात हैदराबाद संघाने मुंबई इंडियन्सविरुद्ध २७७ धावा केल्या होत्या. त्यांनी स्वत:चा विक्रम मागे टाकला. उत्तरादाखल आरसीबीने २० षटकात २६२ धावा केल्या. या लढतीत झालेल्या विक्रमांवर एक नजर...

१) आयपीएलच्या इतिहासातील सर्वोच्च धावसंख्याहैदराबादने बेंगळुरूविरुद्ध ३ बाद २८७ धावा करत स्पर्धेच्या इतिहासातील सर्वोच्च धावसंख्येचा स्वत:चा २७७ धावांचा विक्रम मागे टाकला.

२८७ हैदराबाद विरुद्ध बेंगळुरू, २०२४

२७७ हैदराबाद विरुद्ध मुंबई, २०२४

२७२ कोलकाता विरुद्ध दिल्ली, २०२४

२) टी-२० क्रिकेटच्या इतिहासातील ही दुसऱ्या क्रमांकाची धावसंख्या ठरली आहे. अव्वल स्थानी नेपाळ असून त्यांनी मंगोलियाविरुद्ध ३१४ धावा केल्या होत्या.

३१४ धावा नेपाळ विरुद्ध मंगोलिया, २०२३

२८७ धावा हैदराबाद विरुद्ध बेंगळुरू, २०२४

२७८ धावा अफगाणिस्थान विरुद्ध आयर्लंड २०१९

३) या लढतीत हैदराबादने आयपीएलच्या इतिहासातील एका डावातील सर्वाधिक षटकारांचा विक्रम केला. हैदराबादने त्यांच्या डावात २२ षटकार मारले. याआधी हा विक्रम बेंगळुरूच्या नावावर होता. त्यांनी पुणे वॉरियर्सविरुद्ध २०१३ साली २१ षटकार मारले होते.

४) या लढतीत दोन्ही संघांनी मिळून ३८ षटकार मारले. टी-२० क्रिकेट मॅचमध्ये ३८ षटकार मारण्याची ही दुसरी वेळ आहे. याआधी हैदराबाद आणि मुंबई लढतीत ३८ षटकार मारले गेले होते. टी-२० क्रिकेटच्या इतिहासात हा सर्वोच्च विक्रम आहे. तिसऱ्या स्थानी बल्ख लीजेंड्स विरुद्ध काबुल झवानन हे संघ असून त्यांनी ३७ षटकार मारले होते.

५) हैदराबाद आणि बेंगळुरूने मिळून या लढतीत ५४९ धावा केल्या. टी-२० क्रिकेटमध्ये एका सामन्यात दोन्ही संघांनी मिळून केलेली ही सर्वोच्च धावसंख्या आहे. याआधीची सर्वोच्च धावसंख्या हैदराबाद आणि मुंबई यांच्यात या हंगामात झालेल्या लढतीत झाली होती, तेव्हा दोन्ही संघांनी मिळून ५२३ धावा केल्या होत्या. या यादीत तिसऱ्या स्थानी वेस्ट इंडिज आणि द.आफ्रिका हे संघ आहेत. त्यांनी २०२३ साली टी-२० लढतीत ५१७ धावा केल्या होत्या.

६) या लढतीत दोन्ही संघांनी मिळून ८१ चौकार मारले. टी-२० क्रिकेटच्या इतिहासात ८१ चौकार मारण्याची ही दुसरी वेळ आहे. याआधी २०२३ साली वेस्ट इंडिज आणि द.आफ्रिया यांच्या लढतीत ८१ षटकार मारले गेले होते. पण विक्रमांच्या यादीत हैदराबाद-बेंगळुरू हे संघ अव्वल स्थानी आहेत. कारण या लढतीत त्यांनी ३८ षटकार मारले. तर वेस्ट इंडिज आणि द.आफ्रिका यांनी ३५ षटकार मारले होते.

७) बेंगळुरूकडून दिनेश कार्तिकने ३५ चेंडूत ८३ धावांची खेळी केली. त्याने ७ षटकार मारले त्यापैकी एका षटकाराने इतिहास घडवला. दिनेशने १६ व्या षटकात टी नटराजनच्या पहिल्या चेंडूवर लेग साइडला षटकार मारला. हा षटकार १०८ मीटरचा होता. जो थेट मैदानाबाहेर गेला. आयपीएल २०२४ मधील हा सर्वात मोठा षटकार ठरला. याच मॅचमध्ये हेन्नरी क्लासेनने १०६ मीटर लांब षटकार मारला होता.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-16T10:07:10Z dg43tfdfdgfd