दिलीप वेंगसरकर अकादमीने उंचावला व्हेरॉक कप,श्रावण राठोडचा शतकी तडाखा

दिगंबर शिंगोटे : श्रावण राठोडच्या शतकाच्या जोरावर दिलीप वेंगसरकर क्रिकेट अकादमी ‘अ’ संघाने तेरा वर्षांखालील गटाच्या व्हेरॉक कप क्रिकेट स्पर्धेच्या अंतिम लढतीत ट्रिनिटी अकादमीवर १२१ धावांनी मात केली आणि विजेतेपद पटकावले. श्रावणने परंडवाल अकादमीविरुद्धच्या उपांत्य लढतीतही शतक झळकावले होते.

वेंगसरकर अकादमीच्या मैदानावर ही स्पर्धा झाली. प्रथम फलंदाजी करताना वेंगसरकर अकादमीने निर्धारित ४० षटकांत ४ बाद १९९ धावा केल्या. त्यात कर्णधार श्रावण राठोडने सिंहाचा वाटा उचलला. त्याने १३१ चेंडूंत पंधरा चौकारांसह नाबाद ११३ धावांची खेळी केली. श्रावणला झिदान मंगाने मोलाची साथ दिली. झिदानने ५७ चेंडूंत सहा चौकारांसह नाबाद ४९ धावांची खेळी केली. श्रावण-झिदान यांनी पाचव्या विकेटसाठी ११७ धावांची भागीदारी रचली. प्रत्युत्तर देताना प्रज्योत गुंडळे, वीरेन मिरजे, आरुष पासलकर, अर्जुन डोंगरे, फरहान मुल्ला, साईश बारटक्के यांच्या अचूक गोलंदाजीसमोर ट्रिनिटी संघाचा डाव ७८ धावांतच आटोपला.

स्पर्धेतील उत्कृष्ट खेळाडू आणि उत्कृष्ट फलंदाज म्हणून श्रावण राठोडला गौरवण्यात आले. राठोडच अंतिम सामन्याचा मानकरीही ठरला. उत्कृष्ट गोलंदाज म्हणून राजवीर बोथराला, तर उत्कृष्ट क्षेत्ररक्षक म्हणून झिदान मंगाला गौरवण्यात आले. स्पर्धेचे पारितोषिक वितरण पिंपरी चिंचवड महापालिकेचे सह शहर अभियंता (स्थापत्य विभाग) मनोज सेठिया यांच्या हस्ते आणि भारताचे माजी कर्णधार दिली वेंगसरकर यांच्या प्रमुख उपस्थितीत पार पडले. या वेळी वेंगसरकर अकादमीचे प्रशिक्षक शादाब शेख, भूषण सूर्यवंशी, चंदन गंगावणे, प्रमोद लिमण, राहुल वेंगसरकर उपस्थित होते.

संक्षिप्त धावफलक : दिलीप वेंगसरकर अकादमी ‘अ’ - ४० षटकांत ४ बाद १९९ (श्रावण राठोड नाबाद ११३, झिदान मंगा नाबाद ४९, वीरेन मिरजे १६, आदर्श चोरघडे २-५०) वि. वि. ट्रिनिटी अकादमी - ३९.४ षटकांत सर्व बाद ७८ (भुजंग धुलगुंडे १२, अर्जुन साळे १२, प्रज्योत गुंडळे २-११, वीरेन मिरजे २-१३, अर्जुन डोंगरे १-५, आरुष पासलकर १-५, फरहान मुल्ला १-४, साईश बारटक्के १-१०, अर्जुन गायकवाड १-१०)

2024-03-18T14:10:42Z dg43tfdfdgfd