दिल्ली कॅपिटल्सच्या पराभवात इशांत शर्माचे होत आहे कौतुक; जॉनी बेयरस्टोने डोक्याला हात लावला, असे कोण बाद होते?

मोहाली: आयपीएलच्या १७व्या हंगामात दिल्ली कॅपिटल्स आणि पंजाब किंग्ज यांच्यात चुरशीची लढत झाली. पंजाबने ही लढत अखेरच्या षटकात ४ चेंडू आणि ४ विकेट राखून जिंकली. टॉस जिंकून प्रथम गोलंदाजी करणाऱ्या पंजाबने दिल्लीला १७४ धावांवर रोखले. त्यानंतर खराब सुरुवातीनंतर देखील पंजाबने सॅम करनच्या अर्धशतकाच्या जोरावर विजय मिळवला.

पंजाब विरुद्धी दिल्लीच्या लढतीत एका रनआउटची चर्चा सोशल मीडियावर होत आहे. दिल्लीकडून खेळणारा भारताचा अनुभवी जलद गोलंदाज इशांत शर्माने अफलातून पद्धतीने जॉनी बेयरस्टोला बाद केले.पंजाबच्या डावाची सुरुवात शिखर धवन आणि जॉनी बेयरस्टो यांनी केली. शिखरने संघाला दमदार सुरूवात करुन दिली, पण तो मोठी धावसंख्या उभी करू शकला नाही. १६ चेंडूत २२ धावा करून तो बाद झाला. त्याच ओव्हरमध्ये पाचव्या चेंडूवर जॉनी बेयरस्टो धावबाद झाला.

इशांत शर्माने टाकलेला शिखर धवनने बोल्ड झाला. त्याच्या जागी आलेल्या प्रभसिमरन सिंहने इशांतच्या चेंडूवर स्ट्रेट ड्राइव्ह मारला. हा चेंडू रोखण्याच्या प्रयत्नात इशांतच्या बोटांना लागला आणि चेंडू नॉन स्ट्रायकरच्या दिशेला असलेल्या विकेट्सला लागला. या प्रकारानंतर दिल्लीच्या खेळाडूंनी तातडीने रन-आउटची अपील केली. अंपायर्सनी टीव्ही रिप्ले पाहिल्यावर लक्षात आले की, जेव्हा चेंडू विकेटला लागला तेव्हा जॉनी बेयरस्टो क्रीझमधून बाहेर आला होता. ज्यामुळे त्याला फक्त ९ धावांवर माघारी जावे लागले.

प्रथम फलंदाजी करणाऱ्या दिल्लीकडून एकाही फलंदाजाला मोठी खेळी करता आली नाही. अभिषेक पोरेलने अखेरच्या काही षटकात केलेल्या वेगवान धावांमुळे दिल्लीला आव्हानात्मक धावसंख्या उभी करता आली. अभिषेकने फक्त १० चेंडूत ३२ धावा केल्या. या शिवाय शाई होपने ३३ धावांचे योगदान दिले. अनेक महिन्यांनी मैदानावर परतलेल्या कर्णधार ऋषभ पंतला फक्त १८ धावा करता आल्या.

पंजाबकडून सॅम करनने ४७ चेंडूत १ षटकार आणि ६ चौकारांसह ६३ धावांची खेळी केली. तर लियाम लिव्हिंगस्टोनने २१ चेंडूत नाबाद ३८ धावा करत संघाच्या विजयात महत्त्वाचा वाटा उचलला.

2024-03-23T16:08:02Z dg43tfdfdgfd