धोनी तू असं का केलं... माही ठरला चेन्नईच्या पराभवाचे कारण, स्टॉइनिसला कोणता दिला मंत्र पाहा...

चेन्नई : महेंद्रसिंग धोनीचे करोडो चाहते आहेत, त्यांच्या मनातील तो ताइत झाला आहे. पण धोनी आता चेन्नईच्या पराभवाचे मुख्य कारण असल्याचे समोर आले आहे. या सामन्यात लखनौच्या मार्कस स्टॉइनिसने नाबाद शतक झळकावले आणि त्यामुळे चेन्नईचा पराभव झाल्याचे आता समोर येत आहे. या गोष्टीचा व्हिडिओ आता चांगलाच व्हायरल झाला आहे.

चेन्नई आणि लखनौ यांच्याती सामना अखेरच्या षटकापर्यंत रंगला होता. ऋतुराज गायकवाडने लखनौच्या गोलंदाजांचा चांगलाच समाचार घेतला. ऋतुराजने ६० चेंडूंत १२ चौकार आणि तीन षटकारांच्या जोरावर नाबाद १०८ धावांची खेळी साकारली. त्यामुळेच चेन्नईच्या संघाला २१० धावा करता आल्या. हा धावांचा डोंगर पाहता चेन्नई सामना जिंकेल, असे वाटत होते. पण लखनौच्या मार्कस स्टॉइनिसने यावेळी ६३ चेंडूंत १३ चौकार आणि सहा षटकारांच्या जोरावर नाबाद १२३ धावांची खेळी साकारली आणि लखनौच्या संघाला एकहाती विजय मिळवून दिला. त्यामुळे सर्वत्र मार्कसचे कौतुक होत आहे, पण मार्कसच्या या शतकामध्ये धोनीचा मोठा वाटा असल्याचे म्हटले जात आहे आणि ही गोष्ट मार्कसनेच सांगितली आहे.

मार्कस म्हणाला की, " महेंद्रसिंग धोनीने एक गोष्ट मला सांगितली आणि मी ती लक्षात ठेवली. धोनी मला म्हणाला होता की, जेव्हा मोठा सामना असतो तेव्हा आपण काहीतरी अतिरीक्त करायचा विचार करत असतो. मला काही तरी वेगळं करायला हवं, असा प्रत्येक जण विचार करत असतो. पण यावेळी तुम्ही जर क्रीझवर असाल तर स्वत:शीच संवाद साधत राहा. तुम्ही जर क्रीझवर कायम राहीलात तर परिस्थिती बदलू शकते. त्यामुळे तुम्ही न बदलता किंवा अन्य काही विचार न करता खेळावर लक्ष द्यायला हवे. जर ही गोष्ट तुम्ही केली तर तुमचा विजय नक्कीच होऊ शकतो." धोनीने दिलेला हा विजयाचा मंत्र स्टॉइनिसने आत्मसात केला आणि त्यामुळेच लखनौला विजय मिळवता आला. त्यामुळे एकाप्रकारे धोनीच चेन्नईच्या पराभवाचे कारण ठरल्याचे म्हटले जात आहे. धोनीने असं करायला नको होतं, अशी चर्चा सध्याच्या घडीला चाहत्यांमध्ये होताना दिसत आहे.

धोनीच्या विरोधात काही म्हटले तर त्याच्या चाहत्यांना ते आवडत नाही, पण इथे तर धोनीचा मंत्रच चेन्नईसाठी पराभवाचे कारण ठरल्याचे पाहायला मिळत आहे. कारण धोनीचा मंत्र चेन्नईच्या विरोधात गेल्याचे पाहायला मिळत आहे.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-24T14:55:30Z dg43tfdfdgfd