धोनी ते रोहित... IPL 2024 मध्ये कोणत्या चार भारतीय खेळाडूंवर असेल सर्वांची नजर जाणून घ्या

नवी दिल्ली : महेंद्रसिंह धोनीच्या निवृत्तीवरून रंगणारी चर्चा, विराट कोहलीची गेल्या १६ वर्षांपासूनची जेतेपदाची प्रतीक्षा, गंभीर अपघातातून सावरून स्पर्धात्मक क्रिकेटमध्ये पुनरागमन करणारा ऋषभ पंत आणि कर्णधारपद गमावण्याची अनपेक्षित नामुष्की आलेला रोहित शर्मा... भारताच्या आधुनिक क्रिकेटमधील या नायकांच्या अस्सल कहाण्यांसह आज, शुक्रवारपासून इंडियन प्रीमियर लीग (आयपीएल) टी-२० क्रिकेट स्पर्धेचा सतरावा मोसम सुरू होत आहे.

महेंद्रसिंह धोनी

आयपीएलनंतर लगेचच यंदा टी-२० क्रिकेट वर्ल्ड कपचेही आयोजन होत आहे. त्या पार्श्वभूमीवर तर यंदाची लीग आणखी महत्त्वाची ठरणार आहे. कायम चकित करणारे निर्णय घेणाऱ्या धोनीने आयपीएलच्या पूर्वसंध्येला कर्णधारपदावरून पायउतार होत आणखी एक धक्का दिला आहेच. मात्र, या दरम्यान पत्रकारांनी त्याला निवृत्तीबाबत प्रश्न केला, तर मात्र तो पुन्हा मंद स्मित करत न बोलताच काढता पाय घेण्याची शक्यता अधिक आहे.

ऋषभ पंत

धोनीनंतर भारताच्या यष्टिरक्षणाची धुरा ऋषभ पंतसारख्या युवा खेळाडूकडे होती. त्याने त्या दिशेने कूचही केले होते. मात्र, गंभीर मोटार अपघाताने पंतच्या यशस्वी वाटचालीला मोठा 'ब्रेक' लावला. तो यातून सावरला असून, पुनरागमन करून पुन्हा एकदा स्वतःला सिद्ध करण्यासाठी सज्ज झाला आहे.

रोहित शर्मा

रोहित शर्मा म्हणजे खास मुंबईच्या थाटातील बिनधास्त व्यक्तिमत्त्व. त्याची हजरजबाबी पत्रकार परिषदेत हशा पिकविते. अशाच विनोदांनी तो मनातले दुःख लपवूनही ठेवतो. यंदा कर्णधारपद काढून घेतल्याचे दुःख मनात साठवून तो मैदानात उतरेल. या गुणी फलंदाजाने पुन्हा एकदा खणखणीत कामगिरीने विरोधकांना प्रत्युत्तर द्यावे, अशी अस्सल रोहितप्रेमींचीही इच्छा आहे.

विराट कोहली

'मला किंग म्हणू नका', अशी विनम्र विनंती विराटने केली खरी; पण त्याच्या मनातली सलही कायम आहे. गेल्या १६ वर्षांत त्याला सातत्याने आयपीएल जेतेपदाने हुलकावणी दिली आहे. एकाच संघासाठी १६ वर्षे खेळण्याचा आयपीएल विक्रम करणारा हा एकमेव खेळाडू आपल्या जोशपूर्ण खेळाने संपूर्ण रॉयल चॅलेंजर्स बेंगळुरू संघामध्ये चेतना निर्माण करण्याचे काम करील. यंदा बेंगळुरूच्या महिला संघाने डब्ल्यूपीएल जिंकली आहेच. पुरुष संघ जेतेपदाचा दुष्काळ संपवितो का ते कळेलच.

यंदाच्या आयपीएलमध्ये धोनी आणि रोहित यांच्याकडे कर्णधारपद नसतील, पण ते कशी कामगिरी करतात याकडे सर्वांचे लक्ष लागलेले असेल.

2024-03-22T12:05:19Z dg43tfdfdgfd